Фариза Оңғарсыноваға арналған республикалық мүшәйра өтеді
![Фариза Оңғарсыноваға арналған республикалық мүшәйра өтеді](/userdata/news/news_21387/photo.jpg)
Қазақстанның Халық жазушысы, ҚР Мемлекеттік сыйлығының лауреаты, ұлтымыздың ұлы ақыны Фариза Оңғарсынованың рухына арналған «Жыр – менің жалғыз тарланым, аялап өтер ардағым» атты республикалық жас ақындардың жабық жыр мүшәйрасы өтеді.
Асқақ рух пен терең сезімге тұнып тұрған нәзік те намысты жырлар туындатқан поэзиядағы өр мінезді өрен жүйрік, қазақ халқының ұлы ақыны Фариза Оңғарсынованың шығармашылығы аса шынайылығымен, асқан көркемдігімен оқырмандарының жүрегіне берік орнықты. Ол өлмес, өшпес мұра қалдырды. Аяулы ақынның ақырғы арманы артынан ерген жауқазын жыр иелерінің өсіп-өнгенін көріп сүйсіну еді. Көзінің тірісінде бірнеше мәрте республика жас ақындарының бәйгесін ұйымдастырды. Халықаралық «Шабыт» фестивалінде талай таланттың бағын ашты. Бірегей тұлға, біртуар дарын иесі ел мен жердің, ертеңге ұмтылған ер азаматтардың, көксеңгірлерді көздеген кеңпейіл халқының келешегі жастар поэзиясы арқылы жарқырап көрінетіндігіне көзсіз сенетін. Міне, осыған орай Атырау облыстық Мәдениет, мұрағаттар мен құжаттама басқармасы және Қазақстан Жазушылар Одағының Атырау филиалы асқақ ақынның жаңашыл көзқарасын, жалынды өмірін, дауылпаз мінезін, туған елге деген перзенттік махаббатын өлеңмен өрнектеп, өршіл ақынның рухын жаңғырта түсу мақсатында және туғанына 75 жыл толуына арналған республика жас ақындары арасында «Жыр – менің жалғыз тарланым, аялап өтер ардағым» атты жабық мүшәйра жариялайды.
Мassaget.kz мүшәйра туралы толығырақ ақпарат алу мақсатында Қазақстан Жазушылар Одағының Атырау облысы бойынша филиалы директоры, ақын Қойшығұл Жылқышиевке хабарласқан еді. Қойшығұл Жылқышиев: «Фариза апамызға арнап республикалық деңгейде жыр мүшәйрасын ұйымдастырып жатырмыз. Бәйге туралы ережеде толық жазылған. Мүшәйра әділ өтуі үшін жабық түрде өткізейік деп шештік. Ережеге «республиканың белгілі ақындары қазылық етеді» деп арнайы көрсетіп қойдық. Ертең өлеңдер келіп түскеннен кейін онға тарта белгілі ақынға бағалатамыз. Олардың кім болатынын қазір өзім де білмеймін. Бірақ олар міндетті түрде ел танитын белгілі ақындар болады. Сол ақындар дауыс беріп, қай ақынның өлеңі мықты екенін анықтайды. Жабық түрде дегеннен кейін біз жүлдені де көрсетіп жазбадық. Бұл мүшәйраның бір ерекшелігі, жеңімпаз атанған ақындар сахнада берілген тақырыпқа қолма-қол өлең шығарады. Негізі мүшәйра деген – қолма-қол өлең шығару деген сөз. Мүшәйраның мінезі сондай болу керек. Жеңімпаздар анықталғаннан кейін, оларды Атырауға шақыртамыз. Жүлдегерлердің жол ақысын (теміржол), қонақүй, ас-ауқат мәселелерін өз мойнымызға аламыз», - дейді.
Жабық мүшәйраның негізгі талаптары:
Республика жас ақындарының жабық мүшәйрасы Ф.Оңғарсынованың туған күні – 25 желтоқсанға орайластырылады. Мүшәйраға жасы 35-тен аспаған ақындар қатыса алады. Мүшәйраға жіберілетін шығармалар 1 қарашаға дейін қабылданады.
Мүшәйра үш бөлімнен тұрады:
Бірінші бөлімге ақындар патриоттық тақырыптағы кез келген өлеңін немесе поэмасын жолдай алады. Бірақ бұл шығармалар бұрын еш жерде жарияланбаған болуы керек. Өлеңдердің көлемі 10-12 шумақтан, поэмалар 50 шумақтан аспауы талап етіледі.
Екінші бөлім Фариза Оңғарсынованың шығармашылығын, өмірін, қоғамдағы орнын, елдікті, ерлікті, әділеттілікті аңсаған ақынның арманын айғақтайтын жырларға арналады. Бұл өлеңдердің де көлемі 10-12 шумақты қамтуы қажет.
Шығармалар бүркеншек атпен және бөлек конвертке шынайы аты-жөні жазылып жіберіледі. Конверт тек комиссия мүшелері толық жиналғанда ғана ашылады.
Ұйымдастыру комитеті жабық мүшәйрада алғашқы екі бөлімнен жеңімпаз атанғандарды Атырау қаласына арнайы шақырады.
Үшінші бөлім жабық мүшәйраның алғашқы екі бөлімінде жеңімпаз атанған осы ақындардың сахнада берілген тақырыпқа қолма-қол өлең шығара алатын қабілетін бағалауға арналады.
Республиканың белгілі ақындары қазылық ететін жабық мүшәйра аталған үш бөлім бойынша негізгі жеңімпаздарды анықтайды. Қазылар алқасы жүлделерді бөліп бере алады.
Жеңімпаздарды марапаттау:
Бас жүлде - біреу;
Бірінші орын - біреу;
Екінші орын - екеу;
Үшінші орын - үшеу;
Арнайы сыйлықтар мен ынталандыру марапаттары
Жабық мүшәйраға қатысушылар ұйымдастыру комиссиясына өздерінің төлқұжаттарын, өмірбаянын және 6х9 фотосуреттерін ала келеді. Жол ақысын (теміржол), қонақүй, ас-ауқат мәселелерін ұйымдастырушылар жағы көтереді.
Шығармалар мына мекенжайда қабылданады:
Атырау қаласы, Азаттық даңғылы, 11 (шарбақ ішінде),
Қазақстан Жазушылар Одағының Атырау филиалы.
Байланыс телефондары: факс: 8(7122) 32-78-03, тел: 8(7122) 75-57-48, 8701 736 64 73, e-mail: agatai_2005@mail.ru
Ұйымдастыру комитеті.
Дайындаған: Нұржігіт Айдархан
Сурет: massaget.kz
Н. Айдархан