"Білім" айдарының бір жылдық қорытындысы

Жыл соңындағы бір жылдық есеп беруді жалғастырамыз. Массагеттің негізгі іргетастарының бірі "Білім" айдары. Жастардың дүниетанымының кеңейіп, дамуына ең бірінші себеп болатын осы бөлім. Сондықтан Массагет ашылған күннен бастап бұған ерекше мән берілді.

Осы орайда қазіргі қазақ студенті мен оқушыларына ең керекті материалдарды сайтқа салып отыруға тырысып бақтық.

Атап айтсақ, Онлайн-сабақ, Тарих, Рефераттар, Мақала, Өнегелі өмір, Білім ордалары, Білесіз бе?, ҰБТ, I-дос, english.kz бөлімдері оқырмандарға кеңінен қызықты да пайдалы ақпарат беріп отырды деп ойлаймыз. Осы уақытқа дейін айдарда ұзын саны 3000 мақала жарық көрді.

Планета ойшылдарының нақыл сөздері ерекше сұранысқа ие болды. Арманға жетудің жолдары, достықтың алғышарттары, даналық туралы ойлар ойшылдардың аузымен әңгіме қылынды.

Еліміздегі оқу орындары мен шет елдік білім беру ордалары туралы кеңінен ақпарат бердік. Назарбаев, ҚазҰУ, Кембридж оқу орындары туралы материалдар көпшіліктің көңілінен шықты.

Студенттерге арнап рефераттар, танымдық мақалалар ұсынылса, 11 сынып оқушыларына арнап ҰБТ тесттері жауабымен қоса ұсынылып отырды. Әлемдегі тылсым әрі қызық құбылыстарды да оқырман назарынан тыс қалдырмауға тырыстық.

Сонымен қатар, астрономиядағы жаңалықтарды да назарларыңыздан тыс қалдырмай, хабардар етіп отырдық. НАСА ғалымдарының ашқан қызғылықты теориялары оқырмандарды бей-жай қалдырған жоқ деп ойлаймыз.

Осы орайда оқырмандарды айдардың дамуы мен сапасының артуы үшін бірлесіп еңбек етуге шақырамыз. "Бірігіп пішкен тон келте болмайды" дегендей сайттан оқығыңыз келетін тақырыптарды бізге жазып жіберулеріңізді сұраймыз.

Дайындаған: Еркебұлан Қайрахан