Кафеде дұрыс тамақтанасыз ба?

Кафеде тәбетті келтіретін мәзірге қарап, атауы "дәмді "көрінген тамаққа тапсырыс бере саламыз. Соның салдарынан қаншама артық тамақ жеп, артық салмақ жинаймыз. Қате таңдау жасамау үшін не істеу керек?

1. Тамақ ішемін-ау деп кафеге жол тартқанда, жолда жасыл шай, минералды су, болмаса кәдімгі су ішіп алыңыз. Осылайша аштық сезімін бәсеңдетесіз, сонымен қатар асқазанды тамақ қабылдауға дайындайсыз.
2. Тамаққа тапсырыс бергенде, тәттіден бас тартыңыз. Тәттіге аса құмар болсаңыз, жеңіл тәтті түрін таңдаңыз. Мысал үшін жеміс салатын.
3. Сұйық тағам ішіңіз. Жеңіл, көкөністер сорпасын таңдаған жөн. Асын сұйық тағамнан бастайтындардың азырақ калория жейтіні дәлелденген.
4. "Екінші" асқа тапсырыс бергенше, жеңіл, кішкентай тіскебасарларды таңдаңыз. 
5. Тұздықтан бас тартыңыз. Кетчуп, майонез сынды тұздықтар астың дәмін келтірсе де, онымен қоса сізге талай артық калория береді.
6. Тағамдардың арасынан буға піскен, суға қайнатылған, пісіру пешінде әзірленген түрлерін таңдаңыз. Майға қуырылған тағамдардан абай болыңыз.
7. "Жаманнан жарты қасық ас қалар" деп, тойып қалсаңыз да, тәрелкедегені соңына дейін жеудің қажеті жоқ. Даяшыдан қалған тамақты өзіңізбен бірге салып беруді сұраңыз.
8. Өзіңізге "Тоқта" дей біліңіз. Тәтті торттың тілімі сілекейіңізді ағызса да, сіз дұрыс тамақтану жолын таңдағаныңызды ұмытпаңыз.

Ал сіз кафеде қандай тағамға тапсырыс бересіз?

Дайындаған: Сания Аринова

Сурет: 5050racing.by