Орта салмақта WBС, WBA (Super) және IBO тұжырымы бойынша бокстан әлем чемпионы Геннадий Головкин K.O. Artist Sports басылымына берген сұхбатында мексикалық Сауль "Канело" Альвареспен достығы не себепті үзілгенін айтты.
Сұхбат кезінде қазақстандық боксшыға: "бір кездері "Канеломен" дос болып, Big Bear лагерінде бірге жаттықансыздар. Достықтарыңыз үзілді ме" деген сұрақ қойылды. "Жақсы түсінісетін едік, бір-бірімізге адам ретінде көзқарасымыз жақсы болатын. Өткен жайттардан кейін... Осы кезде болып жатқанның барлығы - өзін қалай ұстайтыны, адамның жеке басына көшуі, бұл оған жараспайды. Өзін осындай жағдайға қойып отырған адаммен қалай санасасың?" - дейді Головкин.
Еске салайық, былтыр қыркүйекте Альварес пен Головкин Лас-Вегастағы T-Mobile аренасында жұдырықтасқан. 12 раундақа созылған жекпе-жек тең аяқталған еді. Боксшылар биыл 15 қыркүйекте жекпе-жек өткізуге әрең келісті. Бұл жекпе-жек те аталған орында өтеді және HBO арнасы қарымтаны ақылы трансляциялар жүйесі арқылы көрсетеді.
Дереккөз: kaz.tengrinews.kz