Бүгін КВН саласында әзілдің аулын аралап, сатираның сорпасын сарқып ішіп жүрген жандардың мерекесі! "Күле білу - өмір, күлкі болу - өлім, күлдіре білу - өнер" дейміз. Ал қазіргі қазақ КВН-шілері қандай деңгейде күлдіре біліп жүр? Осы аяда әңгіме өрбітіп көрсек қатеді? Сіз қазақша КВН көресіз бе? Көрсеңіз, қай команданың ойындарына сүйсінесіз? КВН саласындағы қазақ күлкісінің керуені қай жолда келе жатыр деп ойлайсыз?
Қанат Әуесбай, Қазақстан Ұлттық телеарнасының журналисі: Еш команданың жанкүйері емеспін. Бірақ көбіне шымкенттік командалардың, Түркістандық команданың әзілдері сәтті шығып жатады. Өйткені, олардың әзілдері барынша қазақи. Тіпті, орысша КВН болса да, шымкенттіктер әзілдерін қазақ акцентімен орысша жеткізгені өздеріне тән бір ерекшелік. Ал бізде орысша сөйлеп кетсе, ешбір акцентсіз тап-таза сөйлейтіндердің ресейліктерден ешбір ерекшелігі жоқ. Бұған аса қызықпайсың да.
Нұрлан Жанай, Жаңа-Ой Орталығының директоры: Мен КВН көремін. Ресейде болатын Қазақстан құрамасының ойындарын қарап тұрамын. Аттасым Нұрлан Қоянбаев ұнайды. Қазақстанда Жайдарман қарап тұрамын. Бірақ ондай фанат емеспін. Есіме түссе, көңіл-күй болғанда, YouTube-тан қарап тұрамын. Теледидардан Жайдарман қарамаймын, себебі өте кеш болады. Жалпы қазақша Жайдарманды көбірек насихаттау керек деп ойлаймын.
Жарас Ниязбек, журналист: Күлкі деген жақсы ғой. Бірақ, арзан күлкі, арсыз күлкі, орынсыз қылжақты қаламаймын. Астарлы әзілмен, тігісін жатқызып, тігісін келтіріп айтылған сатира болса, сөз басқа. Қазіргі сахнадағы КВН саңлақтарының бәрі осындай шеберлікті меңгерген деп айта алмаймын. КВН көрмеймін деп айта алмаймын, кейде көз тоқтататыным бар. Бір мезгіл сергіп, көңіл көтергенге не жетсін! Десе де, сахнадан, теледидардан арзан әзілден гөрі, салмақты сатира күтемін. Ал, осы салада жүрген барша азаматтарды мерекелерімен шын жүректен құттықтаймын!
Жандос Байділдә, журналист: Қазақ КВН-і даму үстінде дейді. Оны неге сүйеніп айтатынын өз басым білмедім. Бірақ, мен Масляковтыкын ғана көремін. Бізде қазақша КВН нашар дейді, орысшасы да оңып тұрған жоқ. Жәй ғана мысал, әнектер әзіл түрінде айтылады. Бірақ, ішінде бірлі-жарымы кеңкілдеп күлуге болмаса да, езу тартуға жарап қалады. Бізде КВН-ге әзіл жазатындар аз, ал әзілді жақсылап ойнап шығатындар да сол маңайда. Масляковтың КВН-не елдер дайын әзілді қымбат сатып алып, соны жоғары деңгейде ойнап шығады. Қымбат әзіл арзан күлкіге ұласпайды. Бары сол ғана... Шымкентте былай, тойдағы қазақ дейтін әзілдер жалықтырады. Дамыса дамып жатқан шығар, бірақ жаңа биііке көтерілген жоқ.