Ғ.Мүсірепов атындағы Қазақ мемлекеттік академиялық балалар мен жасөспірімдер театрының директоры болып ҚР Мәдениет министрінің бұйрығымен Сұлтан Оңғарұлы Сраилов тағайындалды.
Ұжымды жаңа басшымен таныстырып, жаңа директорды басшылық орнына отырғызып кету мақсатында ҚР Мәдениет министрінің орынбасары Асқар Бөрібаев мырза бастаған Қазақстанның және КСРО-ның халық әртісі Асанәлі Әшімов, Қазақстанның халық әртісі Есмұхан Обаев сынды өнер тарландары театр табалдырығын аттады.
Бұған дейін Астана қаласы әкімдігінің Қ.Қуанышбаев атындағы Мемлекеттік академиялық қазақ музыкалық драма театрының директоры-көркемдік жетекшісі қызметін атқарған Сұлтан Оңғарұлы Сраилов ендігі кезекте Ғ.Мүсірепов атындағы Қазақ мемлекеттік академиялық балалар мен жасөспірімдер театрының директоры болып жаңа қызметке тағайындалды.
Сұлтан Оңғарұлының қысқаша өмірбаяны:
1988 – 1990 жылдары Мәскеу қаласында әскери борышын өтеді.
1992 жылы Алматы қаласындағы Т.Жүргенов атындағы қазақ ұлттық өнер академиясын «театр және кино актері» мамандығы бойынша бітірген.
1996-1997 жылдары Арқалық қаласындағы А.Байтұрсынов атындағы театрға режиссер болып қабылданды.
1997 жылы Қ.Қуанышбаев атындағы қазақ драма театрына ауысып, 2009 жылға дейін осы театрда – актер, режиссер, Әдебиет бөлімінің меңгерушісі қызметін атқарған.
2009-2012 жылдары Қ.Қуанышбаев атындағы Мемлекеттік академиялық қазақ музыкалық драма театрында директордың орынбасары қызметін атқарды.
2012 жылдың қаңтар айынан бастап ОҚО «Оңтүстік Цирк» МКҚК Бас директоры болып ауысты.
2013 жылдың қараша айынан Қ.Қуанышбаев атындағы Мемлекеттік академиялық қазақ музыкалық драма театрының директоры-көркемдік жетекшісі болып тағайындалды.
"Жас келсе, іске", - демекші, 68 жылғы тарихы бар театрдың ендігі директоры Сұлтан Сраилов мырзаның алдағы жұмысына табыс, еңбегіне береке, ұжымға бірлік тілейміз!
Жолдаған: театрдың баспасөз қызметі
Дайындаған: Айгерім Сматуллаева