Таласбек Әсемқұлов дүниеден өтті
![Таласбек Әсемқұлов дүниеден өтті](/userdata/news/news_21668/photo.jpg)
Қазақ әдебиеті ауыр қазаға душар болды. Бүгін жазушы, күйші, кинодраматург Таласбек Әсемқұлов дүниеден озды.
Таласбек Әсемқұлов 1955 жылы 1 тамызда Семей облысы Аякөз ауданы «Ақтоғай» теміржол стансасында дүниеге келген. Жазушы проза, сценарий жазу өнерімен пединститутта оқып жүрген студент кезінен айналысқан.
Республикалық баспасөзде «Атайы», «Кәрі ат», «Арылу» сияқты әңгімелері, «Шымдан» повесі және музыканттардың өміріне арналған «Талтүс» романы жарық көрген. «Көкбалақтың өлімі», «Біржан Сал», «Жезтырнақ», «Алматы – Астана», «Тұмар падиша» сынды киносценарийлердің авторы. Сондай-ақ республикалық баспасөзде қазақ және орыс тілінде түрлі әдебиет, мәдениеттану тақырыптарына арналған бірқатар мақалалары жарық көрген.
1976-80 ж.ж. – Алматы қаласы, Абай атындағы педагогикаинституты филология факультетінің қазақша бөлімінде оқыған.
1980-83 ж.ж. – Ықылас Дүкенұлы атындағы Ұлт аспаптар музейінің ғылыми қызметкері.
1984-87 ж.ж. – Республикалық «Жазушы» баспасында әдеби редактор.
1987-98 ж.ж. – Құрманғазы атындағы Алматы мемлекеттік консерваториясы фольклор кабинетінің меңгерушісі.
1998-2006 ж.ж. – Республикалық «Жұлдыз» әдебі журналы сын бөлімінің меңгерушісі.
1973 жылы «Бәйжігіт күйлері» деген жеке гранд-дискі Бүкілодақтық «Мелодия» фирмасынан шықты. «Мәңгілік сары» антологияға 20-дан астам, «Қазақтың мың күйі» (2009) антологияға 40-тан астам күйі енген. 2010 жылы Парижден «Таттімбеттің мұрасы» СД-дискі шыққан.
Мassaget.kz ұжымы марқұмның отбасына қайғырып көңіл айтады.
Н. Айдархан