Ғалымдар Қызыл ғаламшарда оттегі бар екенін анықтады

"Марста өмір бар ма, жоқ па?" деген сұрақ адамзатты қызықтырып келеді. Nature Geoscience танымдық журналы NASA-ның Jet Propulsion зертханасында (JPL) Влада Стаменкович бастаған топтың екі жаңалық ашқаны туралы қызықты мәлімет жариялады. Мамандардың айтуынша, Марстың жоғарғы бөлігінде өмір сүруге жеткілікті оттегі болуы мүмкін екен. 

Жақында Марста мұз бар екендігі анықталғаннан кейін оның астында жерасты сулары да бар болуы мүмкіндігі туралы болжамдар жасалған еді. Егер зерттеушілер айтқандай Марста жерасты сулары болса, онда өмір сүруге жеткілікті оттегі де болуы әбден мүмкін. 
 
2016 жылы марсоход "Кьюриосити" бұрын Марс ғаламшары оттегіге бай болғанын, магниттік өрісінің жоғалуы себепті оттегі қалмағанын анықтады. Бірақ, зерттеушілердің айтуынша, Қызыл ғаламшарда әлі де оттегі қалған.

Екі жаңалықты негізге ала отырып JPL тобы жер асты тұзды көлдерде қанша оттегі болуы мүмкін екендігін зерттеді. Олардың болжауынша, әсіресе полярлы аймақтардағы төменгі температура тұзды көлдердегі оттегінің сақталып қалуы үшін қолайлы орын. Себебі, Марс экваторында температура +20 градус. 

Айта кетейік, осыған дейін Болонья Ұлттық астрофизика институтының ғалымдары Марста шынында су бар екенін дәлелдейтін мәліметтерді жариялады. Ғалымдар Марста кейде мұздың еруінен судың болуы мүмкіндігін, бірақ ғаламшардағы төмен қысымға байланысты оның көп өтпей буланып жоқ болып кететінін анықтаған. Енді Марста тұрақты түрде су бар екені туралы дәлелдер пайда болды. Астрономдардың бұл мәліметтері Science журналында жарияланды. Ғаламшардың оңтүстік полюсіндегі - 68 ° С температурадағы мұздың тереңдігі 1,5 шақырым. Дәл осы мұз астында зерттеушілер кішігірім көл бар деп отыр.