Президент Көкшетау қаласының 2050 жылға дейінгі бас жоспарымен танысты, - деп хабарлайды Massaget.kz тілшісі.
Қасым-Жомарт Тоқаевқа бас жоспар аясында жылу электр орталығы, облыстық көпбейінді аурухана, азаматтық қорғаныс академиясы және көпфункционалды спорт кешені салынып жатқаны жөнінде баяндалды. Бұдан бөлек алпысқа жуық кәсіпорынға есептелген индустриялық аймақтың негізі қаланып жатыр.
Облыс орталығының аумағы 7 мың гектарға ұлғаяды. Бас жоспардағы ерекше нысанның бірі – Қопа көлінің жағасында бой көтеретін заманауи іскерлік орталық. Онда тұрғын үй кешендері, бизнес және сауда орталықтары, әлеуметтік нысандар мен қоғамдық кеңістіктер орналасады. Межелі уақытқа дейін қала халқының саны 500 мыңға жетеді деп жоспарланып отыр. Тұрғындарға қолайлы жағдай жасау үшін жаңа құрылыс алаңдары және реновация бағдарламасы аясында 10 миллион шаршы метрге жуық тұрғын үй пайдалануға берілмек.
Мемлекет басшысы Көкшетаудағы жаңа стадионды кемінде 10 мың көрерменге лайықтап салу жөнінде тапсырма берді.
Қызықты жаңалықтар мен видеоларды көру үшін TikTok арнамызға жазылыңыз!
Ж. Қадыржанова