Ташкентте өтіп жатқан бокстан әлем чемпионатында тағы бір боксшымыз сәтті өнер көрсетті. 80 келі салмақ дәрежесінде өткен кездесуде қазақстандық Нұрбек Оралбай қарсыласы Иордания боксшысы Хусейн Ишаишты жеңді.
Отандасымыз бірінші және екінші раундтарда сауатты жұдырықтасты. Өзі де бірнеше соққы өткізгенімен, қарсыласын көбірек ұрды.
Үшінші раундта да Нұрбек Оралбай Иордания боксшысынан басым түсті.
Айта кетейік, бұған дейін бокстан Қазақстан ұлттық құрамасының капитаны Асланбек Шымбергенов Ташкентте өтіп жатқан әлем чемпионатында жүлдегер атанған болатын.
Оның келесі қарсыласы үндістандық Нишан Дев болады.
Асланбек Шымбергенов 2023 жылғы әлем чемпионатының жүлдесін мерзімінен бұрын жеңіп алды, егер жартылай финалда жеңіске жетсе, әлем чемпионы атағын сарапқа салады.
Айта кетейік, бокстан әлем чемпионаты Ташкентте 13 салмақ дәрежесінде өтіп жатыр. Жартылай финал 12 мамырда, финал 13-14 мамырда өтеді.