Шығыстың балуаны 2021 жылғы "Қазақстан барысы" атанды

Қазақ күресінен 2021 жылғы "Қазақстан барысы" турнирінде шығыс қазақстандық балуан Дәурен Нұралинов жеңімпаз атанды. Алтын белбеу, тайтұяқ пен 25 миллион теңге табысқа кенелді.

Биыл 10-шы рет ұйымдастырылған турнирдің финалдық кезеңінде Дәурен Нұралинов Жамбыл облысы атынан шыққан Ғалымжан Қырықбаймен белдесті. Негізгі уақытта тең түсіп, белдесуде шығыстың балуаны таза жеңіске жетті.

Үшінші орын үшін өткен белдесуде Нұрдәулет Жарылғапов Еламан Ерғалиевті ұтты. 2017 жылы жеңімпаз атанған Еламан алда тұрғанмен, сәтті әдіс жасаған Нұрдәулет жеңіске бастар жолды тапты.

Дәурен Нұралинов "Қазақстан барысы" турнирі тарихында жеңіске жеткен жетінші балуан. Осыған дейін Ұлан Рысқұл (2011), Бейбіт Ыстыбаев (2012, 2015, 2016), Айбек Нұғымаров (2013, 2019), Мұхит Тұрсынов (2014), Еламан Ерғалиев (2017) және Ержан Шынкеев (2018) жеңімпаз тұғырынан көрінген.

2021 жылғы "Қазақстан барысы" турниріндегі белдесулер:

Ширек финал

Ғалымжан Қырықбай - Ерасыл Қажыбаев
Айбек Нұғымаров - Еламан Ерғалиев
Нұрдәулет Жарылғапов - Руслан Әбдіразақов
Олжас Шынкеев - Дәурен Нұралинов

Жартылай финал

Ғалымжан Қырықбай - Еламан Ерғалиев
Нұрдәулет Жарылғапов - Дәурен Нұралинов

Үшінші орын

Еламан Ерғалиев - Нұрдәулет Жарылғапов

Финал

Ғалымжан Қырықбай - Дәурен Нұралинов