Үндістанның Дели қаласында өтіп жатқан семсерлесуден Азия чемпионатында Қазақстан құрамасы төртінші жүлдесіне қол жеткізді, - деп хабарлайды Massaget.kz тілшісі ҰОК-қа сілтеме жасап.
Жарыстың кезекті күнінде Қазақстан құрамасы ерлер арасында шпагамен семсерлесуден чемпион атанды.
Финалға Ерлік Сертай, Вадим Шарлаимов, Никита Жулинский және Кирилл Проходовтан құралған команда шықты. Шешуші кездесуде қазақстандық шпагашыларға соңғы екі Олимпиада ойындарында алтын және күміс медаль жеңіп алған Жапония құрамасы қарсы тұрды.
Тартысты әрі шиеленісті өткен кездесуде Қазақстан құрамасы 45:40 есебімен жеңіске жетіп, құрлық чемпионы атанды.
Осылайша, Қазақстан қоржынында төрт медаль бар. Жекелей сындағы шпага бәсекесінде Ирина Бакалдина алтын медаль жеңіп алса, Руслан Курбанов қола жүлдегер атанды. Сонымен қатар, ерлер арасындағы командалық қылыш сайысында Қазақстан құрамасы қола медаль иеленген болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!