Рыбакина мен Путинцева Аустралиядағы турнирлердің ширек финалында сүрінді

Қазақстандық теннисші Елена Рыбакина Аделаидада (Аустралия) өтіп жатқан WTA 500 турнирінің жартылай финалына шыға алмады. Ол ширек финалда ресейлік Екатерина Александроваға жол берді. 

Ойын 1 сағат 31 минутқа созылды. Екі сетте де Екатерина 6:3 есебімен жеңіске жетті. 

Жеңіске жеткен ресейлік теннисші жартылай финалда Латвия елінің теннисшісі Елена Остапенкомен ойнайды. 

Елена Рыбакинаның келесі жарысы – Australian Open турнирі. Алғашқы қарсыласы – чехиялық Каролина Плишкова. Оны ұтса, испаниялық Кристина Буча немесе ресейлік Анна Блинкованың біреуімен жолығады.

Юлия Путинцева да Хобарттағы (Аустралия) WTA 250 турнирінің ширек финалынан әрі аса алмады.

Ол бұл кезеңде қытайлық теннисші Юэ Юаньмен ойнап, екі сетте 5:7, 6:7(4:7) есебімен ұтылды.

Юлия Путинцева да енді Australian Open турниріне қатысады. Ол іріктеу сайыстары жеңімпаздарының бірімен шеберлік байқасады.