Испанияның Marca журналы Реал Мадрид жанкүйерлері арасында сауалнама өткізді.Жанкүйерлер туриндік Ювентус клубына жақында ауысып кеткен Криштиану Роналду орнын кім басады деген сауалға жауап берген. Сауалнамаға 200 мыңнан артық адам қатысқан. Олардың 26 пайызы Тоттенхэм шабуылшысы Гарри Кейнге дауыс берген. Екінші және үшінші орында 14 пайыз дауыс жинағандар ПСЖ шабуылшысы Эдисон Кавани мен Интер сұрмергені Мауро Икарди.Лион шабуылшысы Мариано Диас пен Бавария клубы футболшысы Роберт Левандовски 15 пайыз дауыс жинаған. Естеріңізге сала кетейік, әйгілі португалиялық футболшы Криштиану Роналду Мадридтің Реалынан Туриннің Ювентус клубына ауысқан болатын. Португалиялық сұрмерген Ювентус командасымен төртжылдық келісімшартқа қол қойған. Жылына 30 миллион еуро көлемінде еңбекақы алады. Ювентус футболшының трансферлік құнына 100 миллион еуро шығындаған. Оны 2 жыл ішінде корольдік клубқа төлейді. Тағы бұрынғы командасына 12 миллион еуро береді. Криштиану Роналду Реал футбол клубы сапында 438 ойынға қатысып, 451 гол соғып, команда тарихындағы ең үздік сұрмерген атанды.