Михаил Шайдоров - Гран-при финалына шыққан тұңғыш қазақстандық мәнерлеп сырғанаушы

Бүгін мәнерлеп сырғанаудан 2024-2025 жылғы маусымдағы Гран-придің финалына Ұлттық құрама спортшысы Михаил Шайдоровтың қатысатыны ресми белгілі болды, - деп хабарлайды Massaget.kz тілшісі.

Қорытынды турнир 6-8 желтоқсан аралығында Францияның Гренобль қаласында өтеді. Әуелде Халықаралық конькишілер одағы (ISU) жариялаған үздік алты спортшының тізімінде Шайдоров болмаған.

Әлем чемпионатының қола жүлдегері (2024), 2 дүркін Еуропа чемпионы Адам Сяо Хим Фа тобығын ауыртып алып, өз жанкүйерлерінің көз алдында өнер көрсете алмайтын болған соң оның орнын Михаил басты.

Қазақстандық Қытайдағы Гран-приде күміс жүлде жеңіп алғаннан кейін қосалқы құрамдағы үміткерлер арасында 1-сатыға көтерілген (маусымда 22 ұпаймен).

Греноблде сынға түсетін ерлер:

• Илья Малинин (АҚШ, 2024 жылғы әлем чемпионы, 2023 жылғы Гран-при жеңімпазы);
• Юма Кагияма (Жапония, Бейжің Олимпиадасының күміс жүлдегері, әлем чемпионатының 3 дүркін күміс жүлдегері);
• Шун Сато (Жапония, 4 құрлық чемпионатының жүлдегері);
• Кевин Аймоз (Франция, 2023 жылғы Гран-придің финалисі);
• Даниэль Грассл (Италия, 2022 жылғы Еуропа чемпионатының күміс жүлдегері);
• Михаил Шайдоров (Қазақстан, 20 жаста. Ол Чунцин қаласындағы турнирде 182.96 ұпай жинап, жеке рекордын тіркеді);

Гран-придің финалы тек таңдаулы спортшылар қатысатын жарыс саналады. Әйелдер және жұптық сында финалға шыққан қазақстандықтар жоқ. Айта кетейік, маусымдағы Гран-при кезеңдері Техас (АҚШ), Галифакс (Канада) Анже (Франция), Токио (Жапония), Хельсинки (Финляндия) және Чунцин (Қытай) қаласында өтті.

Өзекті жаңалықтарды өз уақытында оқу үшін Facebook парақшамызға жазылыңыз!