Қазақстандық кәсіпқой боксшы Али Ахмедов Коста-Месада (Калифорния штаты, АҚШ) өткен бокс кешінде мексикалық боксшы Джовани Хавьер Гоместі бірінші раундта нокаутқа түсірді. Жекпе-жек 8 раундқа жоспарланған болатын. Шаршы алаңдағы шайқас бастала сала Али қарсыласын бұрыштан-бұрышқа қуа жүріп соққының астына алды. Бүйірден тиген жойқын соққыдан кейін мексикалық боксшы жекпе-жекті жалғастыра алған жоқ. Бұл кездесуге NABF Junior чемпиондық атағы тігілді. Сондай-ақ Али жастар арасында WBC чемпиондық атағына ие отандасымыз. Кәсіпқой бокстағы 13 жекпе-жегінде де жеңіске жетті. 10 кездесуінде қарсыласын уақытынан бұрын жеңіп шықты. Жекпе-жек соңынан боксшы қолдау білдірген барша қазақстандықтарға алғысын білдірді. Маған жанкүйер болған барша қазақстандықтарға рақмет айтамын. Жұмысты жақсы орындадық. Жекпе-жек ойдағыдай өтті. Алға қадам басамыз. Алға, Қазақстан! - деді боксшы. Али Ахмедовтің жекпе-жегі01:27:00-де басталады. Айта кетейік, Али Ахмедов Геннадий Головкиннің промоутерлік компаниясындағы боксшылардың бірі. Бүгінгі жекпе-жекке де боксшыны GGG жаттықтырушысы Абель Санчес алып шықты.