Қазақстандық боксшы Абай Қуандықов Ресейде өткен студенттер арасындағы әлем чемпионатында 52 кг-ға дейінгі салмақта жеңістің ең биік тұғырынан көрінді. Абай жартылай финалда жапон боксшысы Накагаки Рюутаромен жұдырықтасып, қарсыласын айқын жеңді. Финалда қытайлық Тайпейден келген қарсыласын жеңіп, әлем чемпионы атанды. 69 кг-ға дейінгі салмақта финалға шыққан Бекболат Құрамысов күміс жүлдегер атанды. Шешуші шайқаста тайпейлік боксшы Пан Хун Минге ұпай айырмасымен есе жіберіп алды. Әлем чемпионатына Қазақстаннан барған төрт боксшының үшеуі жүлдегерлер қатарынан көрінді. Ержан Ордабаев 60 кг-ға дейінгі салмақта қола медаль еншіледі. 75 кг-ға дейінгі салмақта жарысқа барған Амандық Манашевқана алғашқы жекпе-жегінде жеңіліп, жүлделі орынға ілікпеді.