Футболдан Қазақстан ұлттық құрамасының жанкүйерлері 2024 жылғы Еуропа чемпионатының іріктеу кезеңі аясында Копенгагенде Даниямен өткен ойында ойыншыларға белсенді түрде қолдау көрсетті, - деп хабарлайды Massaget.kz тілшісі.
Ал ойыннан кейін жанкүйерлер трибунаны тегіс тазалап кеткен. Оқиға орнынан видеоны қазақстандық блогер Артур Асқарұлы Instagram-дағы парақшасында жариялады.
Кадрлардан Қазақстан туын ұстаған жанкүйерлер қағаз бен пластик шыныаяқтарды, азық-түлік қаптамаларын және басқа да қоқыстарды жинап жатқанын көруге болады.
Даниялық бір жанкүйер "Қазақстан құрамасының қолдаушылары әлемде бойынша ең мықты" екенін айтты. "Сіздер Қазақстанда, ал біз осында жеңіске жеттік", - деді ол.
Еске салайық, 15 қазанға қараған түні Қазақстан құрамасы Еуро-2024 іріктеу матчында Даниямен ойнап, 3:1 есебімен жеңілген еді. H тобындағы жетінші турдың қорытындысы бойынша Қазақстан төртінші орында және 12 ұпайға ие болды. Енді 17 қазанда Қазақстан Хельсинкиде Финляндия құрамасымен ойнайды.
Қызықты жаңалықтар мен видеоларды көру үшін TikTok арнамызға жазылыңыз!