Катардағы әлем чемпионатының қола жүлдегері белгілі болды
![Катардағы әлем чемпионатының қола жүлдегері белгілі болды](/userdata/news/news_75793/image_l.png)
Хорватия құрамасы Катардағы әлем чемпионатының қола жүлдегері атанды, - деп хабарлайды Massaget.kz тілшісі.
Жартылай финалда жеңіліп қалған Хорватия мен Марокко құрамалары қола медальді сарапқа салды. Ойын жылдам голмен басталды. 7-минутта Йошко Гвардиол хорваттарды алға шығарды. Бірақ екі минуттан соң африкалық құрама таразы басын теңестіріп тастады - Ашраф Дари баспен дәл соққы жасады.
Ал командалар үзіліске кетер тұста Мислав Оршич сол жақтан допты айналдыра теуіп, Хорватия құрамасының екінші голын салды.
Екінші таймда қауіпті шабуыл көп бола қоймады - барлық соққыны қақпашылар қайтара алды.
Осылайша, Хорватия құрамасы 2:1 есебімен жеңіп, тарихында екінші рет әлем чемпионатының қола жүлдегері атанды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Е. Төлеш