Тез шаршап қалатын болсаңыз аэробты жаттығумен шұғылданған жөн. Сонда жүрек пен өкпенің жұмысы жақсарып, қан айналымы дұрысталады. Ал жаттығудың ең қарапайым түрі – жылдам жүру.
Артық салмағы бар адамдар жылдам жүріп-ақ дене бітімін қалпына келтіре алады. Өйткені жылдам жүргенде минутына 8 килокалория жойылады. Ал бір сағатта 500 килокалориядан арылуға болады.
Жылдам жүріспен шұғылдану үшін алдымен дұрыс аяқ киім таңдаған жөн. Табаны қалың әрі жұмсақ болуы тиіс. Ал аяқ киімнің өзі ауа өткізетін материалдан жасалуы керек. Жаттығу кезінде ыңғайсыз болмауы үшін жеңіл аяқ қиім таңдаған абзал.
Жаттығуда маңыздысы – жүріс техникасын сақтау. Қадам арасы жиі болғанымен, байыппен жүру қажет. Егер ентіксеңіз, жүрісті баяулатыңыз. Арқа мен басты тік ұстап, түзу қадам жасаңыз. Қол белден кеудеге дейін көтерілуі тиіс.
Жылдам жүріспен өзіңізге ыңғайлы кез келген жерде айналысуға болады. Тау болсын, дала болсын, саябақ болсын, өзіңіздің мүмкіндігіңізге қарай шұғылданасыз. Тауға шыққанда немесе төмен түскенде өзіндік техникалары бар. Бірақ мұның барлығы тәжірибе арқылы қалыптасады.
Жүрген кезде қозғалыс ұзақтығы мен жылдамдығы әркімде әрқалай. Бұл ретте, егер сіз техниканы қадағалап, күш салсаңыз, нәтиже шығады. Орта есеппен аптасына кемінде үш рет минимум 45 минуттан айналысу керек. Бірақ бір сағат жүргеніңіз абзал.
Жылдам жүріс – қауіпті спорт түрлерінің қатарына жатпайды. Жарақат алу көрсеткіші де төмен. Барлық жастағы адам үшін пайдалы. Бірақ кез келген спорт түрі секілді мұнда да жолға шығар алдында дене қыздырып алу керек. Сырқаттанып қалғанда, созылмалы аурулар асқынғанда, отадан кейінгі кезеңде, тірек-қимыл аппараты ауыр зақымданған жағдайда жаттығуды кейінге қалдырыңыз.
Жылдам жүріспен барлық адамның шұғылдануына болады. Бұл спорт түрі адамды төзімге үйретіп, денсаулығы жақсаруына сеп болады.
- адам бойындағы бұлшықеттің 90%-ы шынығады;
- аяқ буыны мен омыртқаға түсетін күш 30%-ға азаяды;
- жүрек соғысы минутына 10–15-ке артады, бұл жүрек-қан тамырлары жүйесіне пайдалы;
- жай жүруге қарағанда калория көбірек жұмсалады, нәтижесінде арықтауға көмектеседі;
- өкпенің көлемі мен дем алатын оттегінің мөлшері артады;
- дене мүсіні мен қозғалыс координациясы жақсарады;
- зат алмасу мен ұйқы қалыпты болып, өмірлік тонус артады;
Алмаз Шарман, медицина ғылымының профессоры