Кәсіпқой бокста ел намысын қорғап жүрген қазақстандық боксшы Иса Ақбербаев спорттық мансабындағы кезекті жеңісіне қол жеткізді. Ол кеше Мәскеуде жекпе-жек өткізіп, қарсыласы Игорь Караваевты бірінші раундта ұрып құлатты.
IBO Intercontinental тұжырымы бойынша бірінші ауыр салмақтағы әлем чемпионы Иса Ақбербаевқа Беларусь елінің боксшысы төтеп бере алмады. Жекпе-жектің басталғанына 1 минут 23 секунд өткеннен кейін қазылар жұдырықтасуды тоқтатуды жөн деп шешті. Нәтижесінде отандасымыз кәсіпқой бокстағы 14-ші жекпе-жегін жеңіспен аяқтады. Оның 10-ында мерзімінен бұрын жеңіске жеткен. Бір кездесуі жоспарланып өтпей қалған.
Негізінен, бұл жұдырықтасу WBA тұжырымы бойынша екінші орта салмақтағы ресейлік Федор Чудинов пен аустралиялық Бен МакКлух жекпе-жегі аясында ұйымдастырылған еді. Бокс кешінің басты кездесуінде ринг иелерінің былғары қолғап шебері жеңіске жетті.
Сурет: vk.com
О. Сансызбай