Ригадағы шайбалы хоккейден әлем чемпионатында Қазақстан құрамасы Канададан жеңіліп қалды.
Кездесу 4:2 есебімен канадалықтардың пайдасына аяқталды. Алдымен есепті канадалық хоккейшілер ашты. Ойынның 6-минутында канадалық Эндрю Манджапане есеп ашса, 21-минутта Оуэн Пауэр есепті үстемелей түсті.
Ал қазақстандық Никита Михайлис 24, 41-минуттарда мергендік танытып, таразы басын теңестірді. Одан кейін канадалық хоккейшілер құрамынан Коул Перфетти 47, Коннор Браун 59-минуттарда гол соғып, қорытынды есепті белгіледі.
Қазақстан келесі кездесуін 29 мамырда Италиямен өткізеді. Өз кезегінде Италия құрамасы келесі күні Канадамен кездеседі.