Қазақстан құрамасының қорғаушысы Еркін Тапалов мансабын алматылық "Қайратта" жалғастырады. Футболшы клубпен жасалған келісімшарты ұзартылғанын растады: енді ол 2026 жылдың аяғына дейін сапта ойнайды, - деп хабарлайды Massaget.kz тілшісі.
"Енді "Қайратпен" келісімшартым 2026 жылдың аяғына дейін ұзартылды", — деді Тапалов Legalbet.kz-ке берген сұхбатында.
Бастапқыда 32 жастағы ойыншының алматылық клубпен бір маусымға жасалған келісімі автомат түрде ұзарту мүмкіндігін қарастырған. Тапалов осы маусымда барлық турнирлерде команданың матчтерінің 50 пайызынан астамына қатысқаннан кейін келісімшарт ұзартылды. Бұған дейін Transfermarkt порталында оның келісімшартының аяқталу мерзімі 2025 жылғы 31 желтоқсан деп көрсетілген еді.
Еркін Тапалов "Қайрат" сапына 2025 жылдың басында, қостанайлық "Тобылдан" еркін агент ретінде ауысып келген. КПЛ маусымында ол 17 матч өткізіп, бір гол соғып, екі нәтижелі пас берген.
Қорғаушы Қазақстан ұлттық құрамасы сапында да 20 ойынға қатысты. Қазір футболшының нарықтық құны 300 мың еуроға (181 миллион теңгеден астам) бағаланып отыр.
Қызықты жаңалықтар мен видеоларды көру үшін TikTok арнамызға жазылыңыз!