Қазақстан құрамасының ойыншысы Дастан Сәтбаев өнер көрсететін Англияның "Бёрнли" клубының бас бапкер Ники Хайенді қызметінен босатты, - деп хабарлайды Massaget.kz тілшісі клубтың баспасөз қызметіне сілтеме жасап.
Мұндай шешім команда Чемпионшиптің 12-турында "Линкольн Ситиден" 1:4 есебімен ойсырай жеңілгеннен кейін қабылданды. Осы кездесуде 18 жастағы қазақстандық футболшы жарақатынан айыққан соң алғаш рет негізгі құрамда алаңға шықты. Алайда 59-минутта оның орнына басқа ойыншы қосылды.
"Бёрнли" футбол клубы бас бапкер Ники Хайенді қызметінен дереу босату туралы шешім қабылдады. Клуб басшылығы мұндай қадамға команданың Чемпионшиптегі маусымды сәтсіз бастауына байланысты барды, – делінген клубтың ресми мәлімдемесінде.
Instagram-дағы бұл жарияланымды көру
Дастан Сәтбаев - Қазақстан құрамасының ең қымбат ойыншысы
Еске салайық, беделді Transfermarkt порталының бағалауынша, 18 жастағы Дастан Сәтбаев – Қазақстан ұлттық құрамасындағы ең қымбат футболшы. Оның трансферлік құны 5 миллион еуроға бағаланады.
Шабуылшының трансферлік құқығы Лондонның "Челси" клубына тиесілі. Ағылшынның атақты клубы оны былтыр сатып алғанымен, Сәтбаев Англияға тек 2026 жылдың жазында ауысты.
Қазір қазақстандық футболшы жалға алу келісімі бойынша "Бёрнли" сапында өнер көрсетіп жүр. Әзірге ол жаңа командасында гол соғып немесе нәтижелі пас беріп үлгерген жоқ.
Instagram-дағы бұл жарияланымды көру
Қазір "Бёрнли" 8 ұпаймен турнир кестесінің 22-орнында тұр. Команда осы маусымда небәрі бір рет жеңіске жеткендіктен, төменгі дивизионға түсіп қалу қаупі бар аймақта орналасқан.
Келесі, 13-турда "Бёрнли" өз алаңында "Портсмутты" қабылдайды. Кездесу 31 қазан, сенбі күні Қазақстан уақытымен сағат 20:00-де өтеді.
Қызықты жаңалықтар мен видеоларды көру үшін TikTok арнамызға жазылыңыз!
Massaget.kz