Бублик пен Недовесов Аделаидадағы турнирдің ширек финалына шықты

Қазақстанның бірінші, әлемнің 31-ракеткасы Александр Бублик Аделаида (Аустралия) ATP 250 турнирінің ширек финалына шықты, - деп хабарлайды Massaget.kz тілшісі.

Доданың 8-ракеткасы болып тіркелген қазақстандық теннисші екінші айналымда дүниежүзілік рейтингіде 40-орында тұрған ұлыбританиялық Дэниел Эванспен шеберлік таластырды.

Бірінші партияда Эванс ширақтық танытты – 6:4. Есесіне екінші сетте Бублик ойын тізгінін қолына алды – 6:2. Үшінші, шешуші партияда қарсыласын ойсырата ұтты – 6:1.

Екі сағатқа созылған бәсеке барысында Бублик 21 эйс жасап, 7 брейк-пойнттың бесеуін пайдаланды. 

Александр Бублик жартылай финалға шығу үшін әлемнің 25-ракеткасы, италиялық Лоренцо Музеттимен кездеседі.

Ал Александр Недовесов эквадорлық Гонсало Эскобармен бірге екінші айналымда жарыстың 7-ракеткалары, ұлыбританиялық Ллойд Глaсспул – нидерландтық Жан-Жюльен Ройермен кортта кездесті. Қазақстандық-эквадорлық дуэт 6:4, 6:4 есебімен жеңіске жетті.

Енді олар ширек финалда германиялық теннисшілер Хендрик Йебенс пен Константин Франценмен кездеседі. 

Екі матч ертең өтеді.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!