Әлемдегі ең танымал дзюдошы Алматыда жаттығып жүр

Дзюдодан Олимпиада ойындарының үш дүркін чемпионы франциялық Тедди Ринер Алматыда жаттығу жиындарына қатысып жатыр. Бұл туралы «Бірінші бол» сайты хабарлады.

Спортшы маңызды жарыс алдындағы дайындығын Алматыда пысықтауды жөн көрген. 35 жастағы Ринер Алматыға 18 қаңтар күні келген, жоспар бойынша 30-на дейін жаттығу жұмыстарын жалғастырады.

Айта кетейік, француз спортшысы 2023 жылдың басында Алматыда оқу-жаттығу жиындарына қатысқан болатын. Сол жолы ол аса ауыр салмақтағы жиырмаға тарта Қазақстан дзюдошысымен спарринг жаттығулар өткізген.

Қазақстан дзюдошылары бұл жолғы оқу-жаттығу жиындарынан кейін Португалия және Парижде өтетін халықаралық жарыстарда бақ сынайды. Ал Ринердің жаттығу алаңы ретінде неліктен Алматыны таңдағаны белгісіз.

Айта кететін жайт, Тедди Ринер Лондон және Рио олимпиадасында жекелей сын бойынша чемпион атанса, Токиода командалық құрамамен топ жарды. Сондай-ақ, Бейжің және Токио олимпиадаларында аса ауыр салмақта қола медальға ие болған. Бұдан бөлек, ол әлем біріншіліктерінде оннан астам рет чемпион атанды. Еуропа біріншіліктерімен қатар, көптеген халықтаралық Гран-при, Гранд-слэм бәсекелерінің жеңімпазы. Ринер 2010 жылдан 2020 жылдар арасында жүз елуден астам белдесуге дейін қарсыластарын жеңіп, рекорд орнатқан спортшы.

Аптаның басты оқиғалары мен пайдалы видеоларды көру үшін YouTube арнамызға жазылыңыз