Қазақстанның ерлер арасындағы жекелей сындағы бірінші ракеткасы Александр Бублик маусымдағы соңғы "Үлкен дулыға" турнирі - АҚШ ашық чемпионатын (US Open) жеңіспен бастады, - деп хабарлайды Massaget.kz тілшісі ҚТФ-ға сілтеме жасап.
Әлемдік рейтингте 16-орында тұрған және турнирге 15-нөмірмен тіркелген қазақстандық теннисші бірінші айналымда дүниежүзілік рейтингтің 253-сатысындағы америкалық Джеффри Джон Вольфпен кездесті. АҚШ өкілі негізгі додаға ұйымдастырушылардың арнайы шақыртуымен (wild card) қатысты.
Төрт сетке созылған кездесу Александр Бубликтің жеңісімен (6:4, 6:2, 3:6, 6:1) аяқталды.
Теннисшілер кортта 2 сағат 15 минут өткізді. Осы уақыт ішінде Александр Бублик 18 эйс жасап, 10 қосарланған қатеге жол берді және сегіз брейк-пойнттың жетеуін сәтті пайдаланды.
Екінші айналымда қазақстандық теннисші аргентиналық Тьяго Агустино Тиранте және франциялық Адриан Маннарино арасындағы кездесу жеңімпазымен ойнайды.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова