Нидерланд құрамасы Катардағы әлем чемпионатының ширек финалына жолдама алды, - деп хабарлайды Massaget.kz тілшісі.
1/8 финалдың алғашқы матчінде Нидерланд пен АҚШ құрамалары кездесті. Еуропалық ұжым ойынның бірінші таймында екі гол соға алды. 10-минутта Мемфис Депай көзге түсті. Ал командалар үзіліске кетер сәтте Дэйли Блинд есепті еселеді. Екі сәтте де Дензел Дюмфрис нәтижелі пас авторы атанды.
Кездесудің 76-минутында Хаджи Райт есеп айырмасын қысқарта алды. Дегенмен, ойын нүктесін нидерландтықтар қойды. 81-минутта Дюмфристің өзі қанжығасын майлады - 3:1.
Осылайша, Нидерланд құрамасы әлем чемпионатының ширек финалына жолдама алды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!