Сочиде көк Туымызды биікте желбіретіп, Әнұранымызды шарықтатқан спортшыларға берілетін сыйақы туралы осыған дейін жазған болатынбыз. Алтын медальды иеленген еліміздің спортшысы 250 мың АҚШ долларын қалтасына басатын болады. Бұл ретте еліміз жүлдеге берілер сыйақы мөлшері бойынша көш бастап тұр екен. Ал өзге елдерде ақ Олимпиаданың алтынын алған спортшы қанша сыйақы алатынына көз жүгіртіп көрейік.
Жарыс қожайындары алтыннан алқа таққан спортшыларына 122 мың АҚШ долларын санап беруге әзір көрінеді. Ал күміс жүлдеге 76 мың, қолаға 52 мың АҚШ долларын дайындап отыр. Ал Еуропадағы көптеген мемлекеттер жарыс жеңімпаздарына әр түрлі сыйақыларды белгілеп отыр.
Норвегия, Ұлыбритания және Жаңа Зеландия елдерінде Олимпиада чемпиондарына арнайы сыйақы белгіленбейді. Британдық спортшылар тек «Team GB» бағдарламасы бойынша ақша алатын болса, норвегтер сыйақыны спортшыларына жыл қорытындысындағы жетістігіне қарай тағайындайды екен.
Швеция Олимпиада комитетінің басшысы Стефан Линдеберг Сочи жеңімпаздарына ешқандай сыйақы қарастырылмағаны жөнінде айтқан болатын. Алайда жақында Швеция бұл ақ Олимпиадаға осыған дейінгі додалармен салыстырғанда рекордтық көрсеткіштегі сыйақыны тағайындап отырғаны белгілі болды. Оны елдің шаңғы федерациясы ұсынуда.
Солтүстік Америка елдерінде сыйақы мөлшері аса жоғары емес көрінеді. Олимпиадалық орталық сыйақымен қамтамасыз етсе, мемлекет жеңімпаз спортшыны салық төлеуден босатады екен. Сонымен қатар, спортшының жарнама арқылы табыс табуына жағдай да қарастырады.
Ең құпия сыйақы мөлшері – Қытайда. 10 жылдан бері жазғы Олимпиада ойындарында биік тұғырдан көрініп келе жатқан «аспан асты елі» спортшылары қысқы Олимпиадада жоғары көрсеткішке қол созып келеді. Алайда ел басшылығы Олимпиада чемпиондарына берілетін сыйақы мөлшерін құпия сақтайды. Кей деректер бойынша, чемпион атанған спортшыға 500 мың юань (шамамен 82 мың АҚШ доллары) табыстайды екен.
Өзге де мемлекеттер сыйақы мөлшері: (АҚШ долларымен)
Мемлекет
Алтын
Күміс
Қола
Қазақстан
250 000
150 000
75 000
Италия
192 000
103 000
69 000
Белоруссия
150 000
75 000
50 000
Ресей
122 000
76 000
52 000
Украина
85 000
62 000
41 000
Франция
69 000
27 000
18 000
Швеция
30 000
9 000
5 000
АҚШ
25 000
15 000
10 000
Германия
21 000
14 000
10 000
Канада
20 000
15 000
10 000
Дайындаған: Өмірбек Сансызбай
Сурет: alaman.kz