Күз-2012: сәнді көзәйнектер топтамасы

Көзәйнектерді жаз бойы шешпей өттік. Келе жатқан күз де бұл аксессуардың өзектілігін кемітпейді. Күзде қандай көзәйнектер сәнде болмақ?

Көзәйнек тек көзді зиянды сәулелерден ғана сақтап қоймай, сонымен қатар сәнді аксессуар болып табылады. Бейнеңізді аяқтайтын соңғы "нүкте" бола алатын бұл бұйымды сәнге сай таңдаңыз.

Теория бойынша көзілдірікті бет пішініне қарай таңдауға болады, іс жүзінде мінсіз пішінді көзәйнекті тек киіп көріп таңдаса болады. 

Күз-2012 маусымының ең сәнді көзілдірігі дөңгелек пішінді болмақ. Мәселе тек пішінде ғана емес, өлшемде де. Бұл маусымда ең үлкен көзілдіріктер ең сәнді болмақ. Беттің жартысын жабатын дөңгелек көзілдірік - дизайнерлердің нағыз арманы. Танымал Yves Saint Laurent, Burberry, Oscar de la Renta, Diane von Furstenberg, Stella McCartney сән үйлерінің топтамаларының бәрінде осындай аксессуар бар. 

Жалпы осындай пішінді көзілдіріктер беті төртбұрыш, созыңқы келген аруларға жарасады. Олар киген бойда бетті домалатып, жұмсартады.

Stella McCartney

Жартылай дөңгелек, жоғарғы жағында жолағы бар көзілдіріктер де сәнде. Жоғарғы жағындағы жолақ келбетіңізге байыптылықты қосады. Бұндай көзілдірікті іскерлік стильдегі киіммен киген дұрыс. Айта кетсек, осындай көзәйнектер түзу кекілі бар қыздарға өте жарасады.

Giorgio Armani

Өз орнын әлі де төртбұрыш пішінді көзәйнектер бермеуде. Сәнде кез келгені: үлкені де, кішісі де, металл не пластик жиектемедегілер.

KAREN WALKER

ХХ ғасырдың 50-60 жылдарының тренді "мысық көздер" сәнге оралды. Мерилин Монро, Софи Лорен сынды сұлулардың сүйікті аксессуарлары болған осындай көзәйнектер кез келген стильдегі киіммен жарасуы тиіс.

River Island

Бұл маусымдағы ең сәнді трендтердің бірі - кереғар түстер. Жиегінің түстері түрлі бола тұра, киіміңіздегі аксессуардың бір түсіне сәйкес болса, бұл нағыз сәннің өзі. 

Reserved

Күздің тағы да бір ерекшеліктерінің бірі - мөлдір жиекті көзәйнектер. Бұл аксессуармен сіз тек сәнді ғана емес, сонымен қатар өте ерекше боласыз. 

AJ Morgan

Дайындаған: Сания Аринова

Суреттер: lady.mail.ru