Әшекейді қай аяққа тағу керек?

22 маусым 2014, 15:52

Арулар бар сұлулығын паш ететін жадыраған жазда бет, тырнақ, дене күтімі өте маңызды. Сондай-ақ дұрыс таңдалған әшекей сұлулығыңызға әсемдік үстеп, сізді жаздың ханшайымына айналдыра алмақ. Біз бүгін аяққа арналған әшекей жайлы айтамыз.

Әшекейді қай аяққа таққан дұрыс? Бұл сұрақтың нақты жауабы жоқ. Өйткені аяқ әшекейін әр халық өз дәстүріне сай таққанды жөн көреді.

Аяқ әшекейі Азияда дүниеге келген. Іш биі аяққа әшекей тағу арқылы биленетінін білеміз. Үндістан қыздары үшін аяқ әшекейі үнемі тағылатын ажырамас сән бұйымы. Ежелгі заманда оң аяққа тағылған әшекей әлеуметтік кемсітуді білдірген, ал әшекей сол аяққа тағылған болса, ол әйелдің күйеуі бар екенінен хабар берген.

Ал Америкада сол аяққа жеңілтек қыздар, оң аяққа елден ерекшеленгісі келгендер тағады деген түсінік әлі бар.

Десе де, бүгінде заманауи қыз-келіншектер жаз мезгілінде әшекейді қай аяғына тақса да, ешқандай маңызы жоқ. Өйткені бүгінде аяқ әшекейі тек қана сән үшін тағылады.

Аяқ әшекейін қалай таңдаймын десеңіз, ең ұтымды нұсқа – аса байқалмайтын жіңішке алтын әшекейді таңдау дер едік. Одан кейін әшекей үстіңіздегі киімге сай болғанын қадағалаңыз.

Әлбетте, аяғыңыздағы әшекейге елдің көзі көп түсетіндіктен, аяғыңызға ерекше күтім жасап, педикюр жайлы да ұмытпаңыз.