Қазіргі кезде фотоаппарат әрбір үйде бар десек еш қателеспейміз. Той-томалақ, думанды кештерді есімізге сақтауға осы фотоаппарат көмектеседі емес пе? Редакциямыз Panasonic DMC - S1 фотоаппаратын сынақтан өткізіп, бұл құрылғы жайлы өз пікірін сізге ұсынбақ.
Алғашқы танысу
Алдарыңызда Panasonic компаниясы шығарған "S" топтамасының DMC - S1 қолжетімді үлгісі. Осы үлгі өз бәсекелестерінен көзтартымды дизайнымен және LUMIX деп үлкен әріптермен жазылған сөзбен көзге түседі. S1 үлгісі берік және сапалы пластиктен жасалған, бұған қоса құрылғының өлшемдері кішкентай болғандықтан, оны қалтаңызға салып, әрдайым өзіңізбен алып жүруіңізге болады. Осы үлгінің ең басты артықшылығы - 660 мас аккумуляторлы батареясы. Енді той немесе басқосу басталар алдында саусақты батареяларды сатып алу үшін асығып-үсігіп дүкенге жүгірудің қажеті жоқ. Батареяны қорек көзімен зарядтайтын құрылғыға салсаңыз болғаны.
Құрылғының дизайны көзтартарлық
2,7 дюйм дисплей қолданушы көңілін бірден өзіне тартып алады
Фотоаппаратпен бірге бағдарламасы бар CD, ақпаратты компьютерге тасымалдауға арналған USB сым, қолға арналған бау, зарядты құрылғы бірге беріледі.
Фотоаппараттың маңдай бетінде жарықтандыру шамы мен микрофон орналасқан болса, жоғары қырында қосу/өшіру мен түсіру пернелері бар. Сол жақ қырында USB сымды қосуға арналған интерфейс пен қол бауын өткізуге тесік жасалған. Төменгі жағында аккумуляторлы батарея мен SD жады карталарына арналған ұяшықтар.
Түсіру, қосу/өшіру пернелері
USB тіркеуіші арқылы суреттерді компьютеріңізге жүктей аласыз
Жады қартасы мен батареяға арналған ұяшықтар
Құрылғының пернелеріне көз қырын тастасаңыз, бәрі де түсінікті. Және де функциялардың сан алуан санында еш қателеспейсіз. Артқы жақтың үлкен бөлігін 2,7 дюймілі дисплей алып жатыр.
Функционалдылығы
Жаңа S1-дің сырты қандай керемет болса, іші де соған сай екен. Құрылғының негізінде 12,1 Мп-ді CCD матрица жатыр. Бұның көмегімен 4000*3000 пиксельді сурет түсіре аласыз. 28 мм фокус арақашықтығы бар объективтің арқасында үлкен жиындағы қалың жұрт пен керемет көзтартарлық пейзаждарды түсіруге мүмкіндігі пайда болады. Ал 4 есе жақындататын оптикалық ZOOM алыста орналасқан заттарды жақындатып түсіруге арналған. Бұған қоса, құрылғыда оптикалық тұрақтындарғыш фото түсіру барысында қолды дірілдетпей, сурет сапасының мейлінше жақсы болуына кепілдік береді. Қораптың сыртында 720р деп жазылғанымен, бұл құрылғы HD сапалы бейнені түсіре алмайды екен. Енді сіз не күтіп едіңіз, заманауи кәсіпқой фотоқұрылғылардың өзі бұндай көрсеткіштермен мақтана алмайды.
Пернелердің функционалдылығында еш қателеспейсіз
Мүмкіндіктері
Енді құрылғының мүмкіндіктерін сынап көрейік. 12,1 Мп-ді CCD матрицаның көмегімен түсірілген фотолардың бірнешеуін сізге ұсынайық.
Портрет тәртібінде түсірілген сурет
Стандартты тәртіпте түсірілген сурет
Қорытынды
Қорыта айтқанда, бұл құрылғы сапасы жаман емес суреттерді түсіруге мүмкіндік беріп, жадыға жазылған бейненің қанағаттанарлық сапасымен көзге түседі. Бұл үлгі әуесқойларға арналғанымен, сапасы өте керемет суреттермен мақтана алады. Егер сіз арзан әрі функционалдылық пен сапаның керемет қатынасын іздесеңіз, жоғарыда айтылған үлгі керемет таңдау болатыны анық.
Форумда талқылау
Суреттер massaget.kz