Ғалымдар машинаны ой арқылы басқаруды үйренді

Эссека университетінің ғалымдары ой арқылы машиналарды басқаруды үйренді. Қос зерттеуші арнайы аппараттар арқылы виртуалды ғарыш кемесін ұшырып, басқара білді.

Процесс барысында нейрокомпьютерлік интерфейс жүйесі қолданылған. Бұл аппарат кәдімгідей адам ойын оқыды деген сөз. "Бұл құрылғы арнайы датчиктер арқылы мидан бөлінетін сигналдарды қабылдап, шешім шығарады. Осылайша компьютерге белгілі бір шара қолдануға бұйрық береді. Медиктер бұл әдісті мүгедектерге көмек беру үшін қолданады. Нақтырақ айтсақ, арбаға таңылған адамдар көлігін осы технология арқылы басқара алады", - деді жоба авторлары. Дегенмен ғалымдар бұл технологияны әлде де жетілдіру керектігін айтты.Себебі жүйе кейде қателесіп те жатады екен. Айта кетелік, мұндай тәжірибелер бұған дейін де бірнеше рет өткізілген болатын. Бірақ бұл жолғы жұмыстың басты ерекшелігі, кемені бір емес, екі адамның қоян-қолтық отырып басқаруында болды. Сонымен қатар, жүргізушілерге берілген тапсырма да күрделі болды.

"Екі адам бірігіп отырып ой арқылы кемені белгілі бір бағытқа бұрып отыру керек болды. Олардың таңдауына 8 түрлі бағыт ұсынылды. Процессор осылайша жүргізушілердің ойын оқып, кемені бұрып отырды", - деп сұхбат берді ғалымдар.

Ғарыш кемелері

Тәжірибе соңында екі адамның бірігіп отырып жұмыс жасауы прибордың нақтылығын 67 пайыздан 90 пайызға дейін арттыратындығы белгілі болды. Сонымен қатар, процессордың реакциясы да екі есе жылдам болатындығы анықталды. Мәселен жүргізушілер бір мезетте кемені кері қарай бұру туралы шешім қабылдаса, компьютер олардың бұл ойын әлдеқайда тезірек түсініп отырған. Ғалымдардың айтуынша, екі мидың сигналын пайдалану фондық шуды біршама бәсеңдетеді. Сонымен қатар, бұл әдіс бір адам жұмыс істеген кезде орын алатын ойдың бөлініп, басқа жаққа алаңдау уақытын толықтырады.

Айта кетелік, бұған дейін NASA ғарыш агенттігі марсоходтарды оймен басқару мүмкіндігін зерттеп көрген болатын. Тәжірибе сәтті аяқталса да, орталық қызметкерлері бұл жүйені іс жүзінде пайдалануға әлі ерте екендігін айтты.

Дайындаған: Еркебұлан Қайрахан

сурет: ru.tsn.ua, xn--24-1lcijbtc.xn--p1ai