«16 жасқа толмағандардың әлеуметтік желілерде тіркелуіне шектеу енгізу» тақырыбы аясында ұйымдастырылған отырысқа мемлекеттік органдар мен түрлі ұйымдар, қоғам белсенділері қатысты. Жанат Мұратұлы Ақпарат және коммуникациялар министрлігі мемлекеттік мекеме ретінде интернет пен әлеуметтік желілер мұқият бақыланатынын, зиянды мәліметтер де бұғатталатынын айтты.
«Әрине, біз құзырлы органдармен бірлесе отырып, пайдасынан зияны көп сайттардың қызметін тоқтатамыз. Одан бөлек, жеткіншектер көп үйірсектейтін әлеуметтік желілерді де қатаң қадағалап, сараптап отырамыз. Жыл басынан бері 20 мыңнан астам материалды бұғаттадық. Оның басым бөлігі балаларды өз-өзіне қол жұмсауға жетелейтін, порнографиялық сипатқа ие немесе теріс ағымға үндейтін, тіпті, бұзақылық әрекеттер арқылы қатігездікке баулитын бағытта болғандықтан осындай шешім қабылдадық», – деді ол.
Жиында мәселенің өзектілігі мен әлеуметтік маңыздылығына байланысты балаларды интернеттің қауіп-қатерінен қорғау үшін техникалық мүмкіндіктер арқылы қойылатын шектеулер туралы да ұсыныстар айтылды.
Соның бірі байланыс операторлары «балалар интернеті» деп аталатын қызметті іске қосуы туралы болды.
«Бәлкім, байланыс операторларымен бірлесе отырып жеткіншектерге арналған шектеулі «балалар интернеті» қызметін іске қосу керек шығар. Бұл кейбір елдердің тәжірибесінде бар. Белгілі бір деңгейде интернеттің тарифін енгізіп, өзгесіне шектеу қойылуы қажет. Оның ерекшелігі сол – балаларға ұсынылған интернетте зиянды контентті бұғаттау міндеттеледі», – деді Ж.Қожахметов.