Top Gear командасы Қазақстанға ұшып келе алмай Лондонға қайтты

Top Gear автошоу командасы "Аэрофлот" әуе компаниясындағы жағдайға байланысты Қазақстанға ұшып келе алмай, Лондонға қайтуға мәжбүр болды. Бұл туралы ҚР Қаржы министрлігі Мемлекеттік кірістер комитетінің ресми өкілі Жамбыл Сұрағанов айтты. Ол шетелдіктердің Қазақстанға ұшып келуі бойынша консультациялық көмек көрсеткен.

"27 наурыз күні Астана уақыты бойынша сағат 24.00-де "Аэрофлоттың" Қазақстанға дейінгі барлық рейсі жабылды, ал Top Gear рейсі сағат 22.50-де, яғни олар үлгеретін болған. "Аэрофлот" Шымкентке дейінгі рейсін орындап үлгереміз деп болжады, бірақ ұлыбританиялақтар бәрібір ұшып шыға алмады. Кейін әуе кеңістігі ашылғанда рейстер бірден Алматыға бағыттала бастады, бірақ Шымкентке дейінгі рейс жөнелтілмеді, оның 28-і күні орындалатыны айтылды. Маған түсіндіргендері бойынша, жолаушыларға транзиттік аймақта бір тәуліктен артық уақыт болуға тыйым салынған. Сондықтан Top Gear тобы Лондонға қайтуға мәжбүр болды. Олар қазір Лондонда", − деді Сұрағанов.

Оның айтуынша, енді бағдарламаның Қазақстандағы түсірілімі белгісіз болып тұр. Барлығын продюсерлер шешеді, себебі сапар үшін қосымша қаржы қажет. "Қазір үлкен кеңес болады, ол жерде бағдарламаның Қазақстандағы түсірілімі жөнінде шешім қабылданады. Негізінен, Қазақстанда оларды қарсы алатын адамдар бар", − деді ол. Оның айтуына қарағанда, барлығы түсірілім тобының Қазақстанға 31 наурызға дейін жетуіне байланысты.

"Түсірілім екі бөлімнен тұрады, біріншісі − көліктерді тесттен өткізу, екіншісі − "Байқоңырда", ол жерде зымыранды ұшыру жоспарланған. Олар үшін бұл шараға қатысу өте маңызды, ал ол 31 наурызда өтеді", − деді Сұрағанов.

Айта кетейік, "Аэрофлот" әуе компаниясы Қазақстанға дейінгі тұрақты рейстерін тоқтататынын мәлімдеді, себебі ресейлік тарап ұшуға қажетті рұқсатты алмаған.

Еске сала кетейік, бұған дейін атақты Top Gear бағдарламасының еліміздетүсірілетіні туралы хабарланған болатын. Top Gear - ағылшынның автомобильдерге арналған танымал бағдарламасы. Бағдарлама 1977 жылдан бері шығып келеді. Бағдарламаның ресми тарату аудиториясы шамамен 350 миллион адам. Ұлыбританияда ол BBC Two және BBC Two HD арналарында таралады. Ал 2009 жылы Top Gear онжылдықтың үздік бағдарламасы атанған еді.