Этикеткасына қарап жу

29 мамыр 2012, 12:20

Киім жуу кір жуу машинасы пайда болғаннан кейін әлдеқайда жеңілдеді. Алайда бұндай кір машинасында киім жуудың да өз сырлары бар екен. Киім түсінің өзгеруі, матасының тозуы сияқты қиындықтар осы құпияларды білмегеннен болады.

Қазір әр киімнің этикеткасында сол бұйымды қалай жуып, кептіріп, сығуы керектігі туралы кеңестер бар. Белгілермен берілетін бұл кеңестерді тек оқи білу керек.

	Қолмен жуу Бұндай белгі киімді "қолмен жуу режимінде" жуу керектігін білдіреді. Алайда қазіргі кір жуғыш машиналары қолмен істелетін тірлікті алмастыра ала ма? Толықтай емес. Сондықтан ерінбей, бұл киімді қолыңызбен жуған жөн. Сонымен қатар, оны қатты сықпай кептірген дұрыс. Немесе кір жуу машинасын пайдалансаңыз, сығу режимінде ең аз шаманы қолданыңыз.
	40 40, 30 деген жазуы бар белгі киімді жууға болатын температуралық режимді көрсетеді. Белгінің астында сызық болмаса, кір жуу машинкасында максималды сығу режимін қолдансаңыз болады. Ал белгінің астында бір сызық болса, оны синтетикалық киімдерге арналған режимде жуған жөн. Екі сызықшасы бар белгі түкті киімді жуу режимін қолдану керектігін көрсетеді.
	Кептіру Төртбұрыштың ішіндегі дөңгелек белгісі киімді машинада кептіруге болатындығын көрсетеді. Дөңгелек ішінде бір нүкте болса, кептіру төменгі температураларда, егер нүкте екеу болса, жоғары температураларда болу керек.
	Үтіктеу Үтік белгісінде бір нүкте болса, бұл киімді төменгі температурада үтіктеген жөн. Екі нүкте орта температураны, ал үш нүкте киімнің жоғары температураларға шыдай алатындығын көрсетеді.
	Хим тазалау Дөңгелек белгі құрғақ химиялық тазалауды қолдануға болатындығын көрсетеді. Құрғақ химиялық тазалау судың қолдануынсыз кір дақтарынан, шаңнан құтылуға көмектеседі. Ол тіпті киім түсінің жақсы сақталуына көмектеседі, киім бұйымдарының пішінін қалыпқа келтіру үшін де пайдасы зор. Сызылған дөңгелек бұл киімді химиялық тазалаудан өткізуге болмайды деген белгі.
	Ағарту Үшбұрыш осы киімді кез келген ағарту жолымен тазалауға болатындығынан хабар береді. Боялған не сызылған үшбұрыш - бұған қарама-қарсы белгі.