Қазақта көреген, данагөй кісілерге баласын емшекте жатқанында да, алғашқы мүшел жасқа толарында да сынатуды дәстүр санаған. Олар баланың дене бітіміне, тал бойындағы ерекше белгілеріне, жатысына, ұйықтауына қарай мынадай болжамдар жасаған:
Бір құлағынан екінші құлағы үлкен болса – күйші, маңдайы кең болса – жайдары; Құлағы мен аузының арасы жақын болса – өтірікші; Желкесінің шұңқыры үлкен болса – жалқау; Бас бармағы үлкен, сүйрік болса – сері; Бармағы майысқан болса – шебер; Бетінде қалы болса – балуан болады деп тұжырымдаған. Нәресте анасының омырауын тас қылып ұстап отырып емсе – сараң, алақаны ашық, алаңсыз емсе – жомарт, ер бала көзін ашып ұйықтаса – бақытты, жары сұлу болады деген. Қыз бала осылай ұйықтаса – күйеуі көрікті болып, бақытты өмір сүреді. Нәресте үнемі жастықтың үстінде ұйықтаса – ел басқаратын көсем; Көрпені тұмшалап орап ұйықтаса – ынжық; Шалқасынан жатып ұйықтаса – мінезі жайдары, ақкөңіл азамат болып ержетеді деп топшылаған. Аяқ-қолын төрт жаққа созып, бей-жай ұйықтаса – төрт құбыласы тең кемеңгер әрі батыр болады деп болжам жасаған екен.
Ендеше, сіздің үйдегі бөбектің жағдайы қалай?
Дайындаған: Мейіржан Әуелханұлы
Сурет: kerekinfo.kz