Әлемнің түрлі кереметтерін өз көздерімен көріп, жер жүзін аралауды ұнататын жандар түбінде десинхроноз ауруына шалдығуы мүмкін. Адам баласы бір елден ұшып, басқа елге қонған кезде біраз уақыт жаңа жерге бейімделе алмайды. Сол үшін ұшақтан кейін біраз уақыт (не күн) демалып, күш жинап алу керек.
Ұйқының бұзылуы, тәбеттің болмауы, бас ауруы, депрессия десинхроноз дертінің белгісі болып табылады. Бұл уақыттардың ауысуынан, дұрыс ұйықтамағандықтан, ауқаттану тәртібінің өзгеруінен пайда болады.
Әдетте, уақыттың ауысуы, айтарлықтай сезіле қоймайды. Алайда, ұзақ уақыт ұшу кезіндегі ауысқан сағаттық белдеулер адам ағзасына тікелей әсер етеді. Жаңа уақытқа бейімделу үшін екі аптадай уақыт қажет. Ал десинхроноз ұшақтан кейінгі алғашқы екі күнде қатты сезіледі.
Егер де сіз алыс жаққа жол жүргелі жатсаңыз, мына ақыл-кеңестерімізге назар аударыңыз:
Сапарға шықпас бұрын, барар мемлекеттің сағаттық белдеуін анықтап алыңыз. Жол жүруге бір күн қалғанда, аздап көз іліп, демалып алыңыз. Жаңа уақытқа бейімделу үшін біраз уақыттың керек екенін ұмытпаңыз. Ұшақта күндіз ұйықтаудың қажеті жоқ. Бұл сіздің ұйқыңызды бұзады. Ұшақта отырған қалпы ұйықтау мойынға, омыртқаға кері әсерін тигізеді. Сондықтан, өзіңізбен бірге жұмсақ жастық алып алғаныңыз жөн. Ұшу уақыты ұзақ болса, жолға жеңіл аяқ киім, еркін киімдер киіңіз. Ұзақ уақыт ұшу барысында орныңыздан тұрып, ары-бері жүріңіз.Суреттер: bdg.by, primeinfo.net.ru