Парижде "Халықаралық мәдениеттер үндесуінің 10 жылдығы" атты жобаның тұсаукесері өтті, деп хабарлайды Астана қаласы әкімшілігінің баспасөз қызметі.
Жоба 2011 жылы ЮНЕСКО Бас конференциясының 36-сессиясында қабылданған. Биыл Қазақстан ұсынған жоба әлемнің 26 мемлекетінен қолдау тауып отыр.
"Осы ауқымды шараға орай ЮНЕСКО-ның Париждегі штаб-пәтерінде аталған ұйымның Атқарушы Кеңесінің 191-ші сессиясында жоба жүзеге асып, ЮНЕСКО-дағы Қазақстанның тұрақты өкілдігі мен Астана қаласының әкімдігі халық аспаптар оркестрінің концертін ұйымдастырды. Париж төрінде Астана мемлекеттік филармониясының өнерпаздары өнер көрсетіп, Құрманғазының күйі күмбірлеп, қазақ әні қалықтады. Азамат Жылтыркөзов, Айзада Қапонова, Еділ Құсайынов, Айгүл Қосанова және тағы басқа да әртістер сахнаның сәнін келтіріп, халық ризашылығына бөленді. Концерт балет әртістері мен «Белес» тобы, «Шалқыма» ансамблінің өнерімен жалғасын тапты.", - делінген таратылған ақпаратта.
Осы орайда сұхбат берген ЮНЕСКО-ның бас директоры Ирина Бокова:
"Бұл жобада Қазақстанның атқаратын міндеті зор. Біз қазақ елін Атқарушы Кеңестің беделді мүшесі ғана емес, мәдениетаралық шаралар мен дінаралық сұхбаттастықты ұйымдастырушы бірден - бір мемлекет деп білеміз", - деді.
Дайындаған: Еркебұлан Қайрахан
сурет: puteshestvien.blogspot.com