Рио-де-Жанейро қаласында өткен ХХХІ жазғы Олимпиада ойындарында қазақ елінің намысын қорғаған спортшыларға алғысымды білдіремін. Бұл туралы Елбасы Нұрсұлтан Назарбаев ХХХІ жазғы Олимпиада жеңімпаздары мен жүлдергерлерінің қатысуымен өткен құрмет көрсету шарасында мәлімдеді.
«Мен Олимпиада ойындарында әділ күрескен спортшыларға алғысымды айтамын. Біз осы байрақты бәсекеге қатыса отырып, келесі бәсекеде алтын, күміс, қола жүлделерді алу мүмкіндігін арттыра түсеміз. Біздің делегацияның мүшелері еңбектену арқылы биік белестерді бағындыруға болатындығына көз жеткізді. Сондықтан барлық спортшылардың болашақта мансабының жоғары болуына, спортта жаңа жетістіктерге жетуіне тілектеспін», - дейді Елбасы.
Сонымен қатар, Мемлекет басшысы барша қазақстандықтардың атынан Рио Олимпиадасында спортшыларды жаттықтырған бапкерлерге, жеңімпаздар мен жүлдегерлердің туған-туыстарына, жанкүйерлерге рахмет айтты.
«Біз бұрынғы Олимпиада жеңімпаздарын неліктен жарыстан шеттеткенін білмейміз. Әрине, Рио Олимпиадасының қорытындысы көңілден шықты. Спорттың аты спорт. Жаттығу керек. Олимпиада чемпиондары үнемі дайындалуы қажет. Себебі, келесі Олимпиадада барлық спортшылар дайындалады. Уақыт орнында тұрмайды», - дейді Н.Назарбаев.
Сонымен қатар, Елбасы жеңіл атлет Ольга Рыпакованың байрақты бәсекедегі жетістігін жоғары бағалады.
«Мен жеңіл атлет Ольга Рыпакованың жетістігін жеке атап өткім келеді. Ольганың қоласы алтынмен тең. Неге? Себебі, екі Олимпиада ойындары аралығында, яғни, Лондон және Риода ол ұл тапты. Баласы бүгінде 3 жаста. Екі баланың анасы болып, Ольга өзінің бабын жоғалтқан жоқ. Жарайсың! Біріншіден ана, екіншіден батыр әйел», - деп түйіндеді ҚР Президенті сөз соңын.
Шара соңы концерттік бағдарламаға ұласты.
Дереккөз: bnews.kz