Тас мүсіннің тағдыры

Ертеде тау ішінде аң аулап күнелтетін бір кісі болыпты. Оның есігінің алдында алып тас мүсін бар екен, бірақ, үй иесі оны елеп-ескермепті. Бір күні қаладан келген оқымысты біреу оның үйінің алдынан өтіп бара жатып, әлгі тас мүсінді көреді. Сатып алғысы келгенін айтып, үй иесіне мың теңгеге беруін өтініпті. Отағасы даладағы тастың мың теңгеге жарағанына қуанып, оны сатып жіберіпті. Есік алды кеңігеніне қуанып, мәз болып қалыпты. Күндердің бірінде әлгі таулық адам көшеде сейілдеп жүрсе, аса сәулетті бір үйдің алдында адамдар иін тіресіп, бірдеңеге кезекке тұрып жатыр екен.

Біреу: «Тезірек келіп көріңіздер, дүниедегі ең тамаша, сәулетті ойма мүсінді көріп көз мейірін қандырыңыздар! Екі мың теңге ғана төлесеңіз болғаны, әлемде теңдесі жоқ көркемөнер туындысын көріп ләззат аласыз» деп бар даусымен айғайлап тұр екен. Бұл не қызық екен деп, әлгі кісі қалтасында бар екі мың теңгесін төлеп, кезекке тұрып үй ішіне кірсе, өзі сатқан әлгі алып тас мүсіні тұрады. Бірақ ол тас мүсіннің әлдеқашан оқымыстының иелігіне өткенін мойындамасқа шарасы болмай, еңсесі түсіп үйіне қайтыпты.

«Қолда барда алтынның қадірі жоқ» деген. Адам өмірі де сол сияқты. Сіз өзіңізде бар дүниелерді ілікке алғысыз деп санамаңыз. Ол бәлкім басқа жерге барғанда, орнын ауыстырғанда керемет құнды дүниеге айналатын шығар... 

Дайындаған: Мейіржан Әуелханұлы

Сурет: nipic.com