Қыздармен салыстырғанда жігіттер...

Ер адам мен әйел адамның жаратылысы мен таным-түйсігін салыстырсақ, неше түрлі жайтқа көз жеткіземіз. Ер адамдар нәзік жандылар таң қалған жайтқа таңданбайды. Олардың көзімен қарасақ, әйелдерге қызықты нәрсе олар үшін түкке тұрғысыз болып қалуы да әбден мүмкін. Сонымен, қыздармен салыстырғанда жігіттер...

Ауырып қалса...

Ер адамдар әйел адамдарға қарағанда ауруға аса төзім танытпайды. Олардың денсаулығы сәл сыр бере бастаса болды, бірден байбалам салады. Емделудің жолын іздейді. Әйелдермен салыстырғанда ер адамдар жаңадан басталып келе жатқан аурудың бетін тез арада қайтарып, тез айығып кететін көрінеді. Өйткені олар сәл қыңқ еткеннен дәріге ұмтылып, керек ем-домның бәрін жасап тастайды. Ауырып жатқанда көп еркелесе де, ауруы ұзаққа бармайды. Ал әйел адамдар өздерінің жанын аямай, дерті жанына батқанша шыдап жүре береді. Сондықтан олар көп жағдайда ауруын өршітіп, өткізіп алады. Сонда да «әйелдің қырық жаны  бар» дегендей, мұны да көбіне жеңіп шығады. Әйел ауырса да, көп уақыт төсекте жата бермейді. Қыбырлап-жыбырлап үйдің тірлігі, баланың жайымен қайта қимылдап қояды.

Жыласа...

Ер адамдар анда-санда ғана көз жасына ерік береді. Бұл тұрғыдан олар әйелдерге қарағанда батылдау. Бірақ олардың ішкі жан-дүниесі құсаны жинай бергеннен әлсіздеу болады. Олар әйелдер сияқты керек кезінде жылап алмайды. Бірі намысқа тырысқаннан жыламаса, бірінің шынымен көз жасы құрғаған. Әйелдер орын алған көңілсіз жайтта да, қуанышты сәтте де, қорқынышты шақта да көзінің жасына ерік беріп, іштегі бар шерін шығарып алады.

Қызғанса...

Қызғанышқа келгенде, ер адам да, әйел адам да бұл сезімді тұсауламаса, әжептәуір жауды жеңіп тастайтындай күшке ие. Егер ер адам өз сүйгенін біреуден қызғанса, ол сүйгенімен қоса әлгі жігітті де жазалауға дайын тұрады. Ал әйел адам көбіне өйтпейді. Ол араларына түскен бөтен әйелге кектенсе де, оның барып шашын жұлуға көп жағдайда оқтала бермейді. Тек өзінің ерінің осы жайтты нақтылап, түсіндіргенін қалайды.

Тамақ дайындаса...

Ер адамдар ас үйге анда-санда бас сұғып, анда-санда қазан-ошаққа жолайды. Ал бір жолап қалса, ол жақтан дәмді тағам жасамай шықпайды. Көбі әйел адамдарға қарағанда ер адамдар тағамды бабымен жасайды деп жатады. Мұның себебін кейбірі әйелдердің ас үйден әбден шаршағандығынан, тамақты аса мән бермей пісіретіндігімен түсіндіріп жатады. Кім не десе де, ер адамдар ас үйге кірсе, сол күні күндегіден ерекше тағамнан дәм ауыз тиеріміз сөзсіз. Бірақ жігіттер тамақ жасап болған соң ас үйде жақсылап бір тазалық жасау керек болады. Жігіттердің көбі алған затын орнына қоймайды және көкөністерді ашыған күйінде қоқысқа салмай, тастап кете салады. Мұнымен келісесіз бе?

Дүкен араласа...

Ер адамдар дүкен аралауға көп уақыт бөлгісі келмейді. Олар өздеріне керек затын аз уақытта таңдап алып шығады. Сонда да оған көңілі толады және оны үнемі үстінен тастамай киіп жүреді. Ал қыздар дүкен араласа, бір тауарды бір тауармен салыстырып, сапасы мен бағасына келіспей, ұзақ жүріп алады да, соңында қайтып айналып басында ұнатқанын алады немесе басқа кірер дүкен қалмаған соң, амалсыз біреуін таңдай салады. Дүкенге сонша уақыт бөлсе де, үйге келген соң алған заты ұнамай оны өткізуге тағы барады. Рас па, қыздар?

Сурет: Данияр Жанжұманов