"Шеше, сен бақыттысың жыламағын"

"Ана бір қолымен әлемді, бір қолымен бесікті тербетеді" деген сөз бекер айтылмаса керек. Дүйім дүниенің, жалпақ жалғанның бар асылын, бар ғаламатын сыйласақ та, ана алдындағы қарызымыз өтелмес. Қиналғанда, қуанғанда есімізге ең алдымен абзал ана түседі. Анадан туған ақындар "Қай жерде мейлі қай елде, әлемнің күші әйелде" деп жырлаған. Келе жатқан 8 наурыз мейрамымен аналарымызды құттықтай отырып, назарларыңызға аналар туралы өлеңдерді ұсынамыз. 

©avdisk.ru

Ана 

Арманыңды ақтармын ба жүрегімде тербесем? 
Айға сіңілі, қарындассың қасиетті Жерге сен. 

Мен өзіңді теңдесі жоқ құдірет деп түсінем, 
Сендік қуат мың есе артық Жердің тарту күшінен.   

Сұлу әлем, әлем сұлу сен жаратқан адаммен, 
Көк жолының қарсылығын қағып тастап барам мен. 

Сендік қуат болар, бәлкім, басын иді көк маған, 
Әркез сенен туғанымды есіме алсам, тоқтаман. 

Ал ұмытсам, ұмыт болып қаларымды білемін, 
Ұмыт қалмау үшін менің шарқ ұрады жүрегім.   

Шат жүріп-ақ қас қаққанша боламын мен шерменде, 
Жетім емес кей ананың жетімдігін көргенде, 

Көз алдымда жас дөңгелеп булығам да ызадан, 
Маған тіпті сөз келмейтін ұяттардан қызарам.   

Бұл дүниеге онсыз-дағы кеткен жоқ па көп есең, 
О, аналар, кей пасықты жаратасың неге сен?! 

Тасбауырлар дүниеге келсін де, тез кетсін де, 
Әлде өзгелер ондайлардан жиіркенсін дейсің бе?   

Қай кеудені жылытады лапылдаған отпенен, 
Өз кеудесін жылытуға құдіреті жетпеген. 

Анаң саған керек болса, балаңа да сен керек,
Кезекпенен ауысатын ғұмыр ғой бұл дөңгелек.

Ана керек, о, адамдар, ана керек адамға, 
Анасыздар аң сияқты күн кешіп жүр ғаламда. 

Пікірімді ұнатпаған таптық та дер дананы, 
Даналықтың қажеті жоқ сыйлау үшін ананы! 

Төлеген Айбергенов

©janubiy.kz 

*** 
Шеше
Сен бақыттысың,
Жыламағын!
Жай түсіп жатқанда да құламадың.
Тәңіріңнен мен едім ғой сұрағаның
Сондықтан жыламағын, жыламағын! 

Бармын ғой
Тірімін ғой,
Қасыңдамын.
Өлмеймін, мен өзіңдей асылданмын.
Таусылып, өз-өзіңнен шашылмағын,
Байырғы берекеңді қашырмағын. 

Мен сенің қанықпын ғой көз жасыңа
Өзім кепіл тот басып, тозбасыма.
Екі жыр жазсам саған бірін арнап
«Шеше» деп жаздым ылғи сөз басына. 

(Тәңірім кеше көрсін кесірімді)
Аспанға жазсам сенің есіміңді!!!
Шеше,
Сен бақыттысың, тербете бер
Құба талдан иілген бесігімді… 

Мұқағали Мақатаев 

©ok.ru

*** 
Бәрі де, Ана,
Бір өзіңнен басталды.
Сен деп жаздым алғаш өлең дастанды.
Қуандым ба,
Өзің бар деп қуандым.
Жыладым ба,
Өзің жоқ деп жас тамды.
Бәрі де, Ана,
Бір өзіңнен басталды.
Жанарыңнан көрдім алғаш аспанды.
Еркелесем, бір өзіңе еркелеп,
Жасқандым ба,
Тек өзіңнен жасқандым.
Алғашқы дәм, ол да сендік сүт еді,
Ақ сүт берген қашанда үміт күтеді,
Отанымның өзі сенен басталып.
Жауларыма жеткен жерден бітеді 

Қадыр Мырза-Әли 

©forallbooks.weebly.com

Ана 

Құлайын деп бара жатам құлдырап, 
Көңілім жүдеп, көзім алды бұлдырап, 
Сол кезде бір ән естимін жақыннан, 
Аққан бұлақ секілденген сылдырап. 
Есім жиып, өз бойымды тік ұстап, 
Тіршіліктің әуенімен тыныстап, 
Сергимін де, сезім гүлін құлпыртам, 
Кел дегендей болады бір күміс бақ.. 
Сөндім-ау деп, өлдім-ау деп ышқынып, 
Қалған кезде бойымдағы күш бұғып, 
Сөнбейсің деп дауыстайды анашым, 
Мен орнымнан жығыламын үш тұрып. 
Ойнап шығам содан кейін құрақтай, 
Жарқылдаймын жүрегімді жылатпай, 
Мүмкін,мүмкін ана махаббаты шығар бұл, 
Мені сүйеп келе жатқан құлатпай. 

Тұманбай Молдағалиев 

©anatili.kazgazeta.kz

Ана

Бесікте – Ана, бесікте – бөбек: 
Бірі тербеледі, бірі тербетеді. 
Бал-бөбек былдыр, өсіп те келеді, 
Анаға жалғыз, сол жетеді. 
Ана, Ана, қайран, ана! 
Тербейді Ана әлемдегі күлкіні, 
Нұр себеді аналардың кірпігі өліге де ояуға, 
Ана дайын біреу үшін жылауға, біреу үшін аяуға. 
Тербейді Ана қуанышты, бақытты, тербейді 
Ана – тебіренеді жаны шын. 
Тербейді Ана уақытты; Барлық әлем – бір-ақ бесік Ана үшін. 
Тербейді Ана бөбегін, 
Сол арқылы тербетеді өз елін, 
Құмын, тауын, өзенін. 
Тербейді Ана көлеңкені, шуақты – 
Планетаның алақаны сияқты... 

Жұмекен Нәжімеденов 

©qamshy.kz

Мама 
Мен сені Тәңірден сұрадым, мама,
Осы арудың құрсағына бітемін деп.
Мен сен үшін талай жыладым, мама,
Ақынның анасы боп өтеді деп.

Мен сені жұбата алмаймын, мама,
Арайлы бір таңың атады деп.
Мен бұл өмірді ұната алмаймын, мама,
Қабырғама бар мұңы батады кеп.

Мен өмірді сонда да сүйіппін, мама,
Сыздайды тек іште, жарам ғана.
Мен бар мұңнан биікпін, мама,
Мен үшін алаңдама!

Бұл өмірде қай ақын жарыған, мама?
Жүрген соң тағдырдың өтінде көп.
Бар болмысым өзіңнен дарыған, мама,
Сен ғарышты туғаныңа өкінбе тек.

Сен мені қазаққа сыйладың, мама,
Ғажаптардан қағылсаң да.
Мен сені азапқа қимадым, мама,
Қанша жыл сағынсам да.

Әйтпесе, білсең ғой, жаным, мама,
Ішім менің – шексіз әлем.
Бұл менің сорым әрі бағым, мама,
Жанарымдағы өксік өлең.

Ішім менің гүлдерге толы ғой, мама,
Нұрға да толы жүрегім ақ.
Біздің тағдыр – азап жолы ғой, мама,
Әйтеуір тілегім ақ.

Әкем – Тәңір, өзің – Ұмайсың, мама,
Ал, мен – Құдайдың баласымын.
Сен бәрібір маған ұнайсың, мама,
Көзімдегі қарашығым..!

Ақберен Елгезек 

*** 
Ана жайлы ең жақсы сөз... 
"Əке, əке, сен айтатын жақсы сөздер көп еді, 
Айтшы енді, ана жайлы ең жақсы сөз не?" деді, 
Ана жайлы... 
Ана жайлы пайғамбарлар сəлемі, 
Ана жайлы ақындардың өлеңі. 

Ана жайлы - қара жердің төзгені, 
Ана жайлы - уақыттың безбені, 
Ана жайлы айтылмаған бір сөз болса əлемде, 
Ол да ананың айта алмаған сөздері. 

Ана жайлы жақсы сөзді есту үшін тыңда, ұлым, 
Тыныштықты, 
Тауды, 
Көлді, 
Ай сəулесін, 
Күн нұрын, 
Ана жайлы сенің тəтті қиялдарың, арманың, 
Ана жайлы менің барлық шындығым. 

Мен айтатын жақсы сөздер көп еді, 
Мен де анамды жақсы көрем, себебі! 
Білесің бе, бұл əлемге адамдар, 
Ана жайлы айту үшін келеді! 

Адамзаттың ең бір асқақ бар əні, 
Жыр еткемен, пір еткенмен ананы, 
Бұл өмірді қалай сүріп өткені - 
Ана жайлы айтқан сөзі болады. 

Ана жайлы - кең дүние - бесігің, 
Ана жайлы аманат пен кешірім, 
Анаң үшін ең жақсы сөз дүниеде - 
Ұлым, сенің есімің!.. 

Ерлан Жүніс