Бүгін – талантты ақын Анна Ахматованың туған күні. Кәусар мұңның, ащы азаптың сырын шертетін ақын жүрегінен туған ғажап жырлардың қазақша аудармасын табу – қиынының қиыны. Соған қарамастан, мына екі өлеңі жаныңызды бір тебірентпей қоймасы анық.
Мен күлуді доғардым...
Мен күлуді доғардым,
Мұздай боп ернім тоңған ем.
Бір үміт тағы жоғалды,
Бір өлең артық болғанмен.
Еріксіз беріп әнімді
Келемеж бенен мазаққа,
Отырам сосын жанымды
Үнсіздігіммен азаптап.
Құшағын жайып сары кеш...
Құшағын жайып сары кеш,
Сәуірдің есті салқыны.
Болса да, жаным, бәрі кеш,
Қуандым көңіл алқынып.
Отыршы келіп қасыма,
Қарашы нұрлы көзіңмен:
Шыланған дәптер жасыма –
Естелік балғын кезімнен.
Күн кештім мұңмен төзімсіз
Алмадым және жұбана.
Кешірші, кешір, өзіңсіз
Қателестім көп, сынама.
Аударған: Құралай Омар