Алғашқы жалақысын әлі алмаған жігіттің сөзі

03 қараша 2012, 12:38

Массагет ұжымы сіздердің назарларыңызға жас ақын Бағашар Тұрсынбайұлының өлеңдерін ұсынады. Өлеңдері бір оқығаннан-ақ көтеріңкі көңіл-күй сыйлайды. Ұтымды ой, көркем сөз қолданыстарын пайдалана отырып, әдемі жыр жолдарын түзетін жас ақынның шығармашылығына үңілейік.

Зулап, зырлап өтіп жатыр бес күнім,
Жаяу жылжып келе жаттым кеш құрым.
Түнгі Алматым күрсінбейді мен үшін,
«Ақшаң жоқ» деп тоқтамайды ешкімің.

Адамдардың көбі бүгін тасбауыр,
(Кім оларға бола алады тосқауыл)
Жол қысқарту үшін ақын ағамның

Өлеңдерін оқып келем жатқа кіл.

Ішің қандай?

Көріп келем сыртыңды
Ақымақ қыз келтіресің күлкімді.
Мына көше таныс маған қараңғы,
Ана жерде донер жегем бір түрлі.

Су сепкендей менің жігіт көңілім,
Әз апамдай әлпештейді мен кім?
Машиналар зулап жатыр адамдай
Ал жарықтар менің жарқын өмірім.

Мүсіркейді аспан жақтан жұлдыздар,
Теңселгендей ұлын ойлап шың-құздар.
Ана өлеңді оқиыншы, сол жырда
Көңіліме жақын менің бір қыз бар.

Бір әлем ғой, жүректегі бір өлең
Жұрт қарайды өлеңіме түнере.
Темекісін бұрқыратып балконнан
Орыс кемпір ұрсып жатыр біреуге.

Керек әлі, басқа мына баспана,
Жә, көңілім қамықпағын босқаға.
Кеше ғана есептеген гонарар
Бүгін-ертең түсіп қалар ақша да.

* * *

Ұлытауға бардым мен,
Ұлар етін жемедім.
Қозылардың шулаған
Көріп қайттым көгенін.
Түнінде түндей түрілдім,
Тасына тайдай сүріндім.

Күміс суын бұлақтың
Сары қымыздай сімірдім.
Думанда сөйлеп, топ жарып,
Есіме түсті қай күнім.
Ұлытау жұрты ұйып тұр
Сөзіне Асан Қайғының!
Сағынып күнде көз ілем,
Жабығып түнде езілем.
Бабамның сөзі қалған жұрт,
Тамырсыз таста шежірем.
Жазылар сен деп дастаным,
Айтылар сен деп қанша әнім.
Арқаның арқа қоздырар
Болатсай түнін аңсадым.
Сөзімді ұғар дүйім ел,
Таңғалмай мына күйіме.
Дәм тартса барып қайтармын
Жездібектің де үйіне.

сурет:yvision.kz

Л. Лига