Кеше, яғни, 31 мамыр күні, ақын Мақпал Жұмабай Алматыдағы тыңдармандарымен шағын кездесу өткізді. Қазақстан жазушылар одағы ғимаратында өткен жиынға Мақпалдың шығармашылығына қызығушылық білдірген 30-ға тарта адам жиналды.
Олардың ішінде Бейбіт Сарыбай, Ерлан Жүніс, Бағашар Тұрсынбайұлы, Шерхан Талап, Асылхан Төлегенов, Жақсылық Қазымұратұлы секілді шығамашылық адамдары да болды.
Ақын жиылғандарға өлеңдерін ұсынбастан бұрын шығармашылығы туралы аз-кем әңгіме айтып берді. "Қазақтың ақындық дәстүрі туралы сөз қозғап бір ғасыр кейінге көз салсақ, бабаларымыздың өз өлеңдерін қолдарына музыкалық аспап алып, мақамдатып жеткізгендігін көреміз. Ол дәстүр қазір де ел ішінде бар. Бірақ кең таралмаған. Мен осы дәстүрдің жаңашыл жалғастырушысымын", - деді ол. Ақын, осы себепті, жиылғандарды кешке музыкалық тұрғыдан көз салып баға бермеуге шақырды.
"Бұны елге түсіндіру керек. Мені көбі бард әнші деп қабылдайды. Бұл пікір дұрыс емес", - деп Мақпал өзінің композитор да, орындаушы да емес, тек өлеңдерін мақамдатып айтатын ақын екендігін жеткізді.
Ақын, бұдан бөлек, өлеңдерінің мақаммен бірге туатындығын да айтты. "Мен оны (өлеңді - ред.) солай қабылдаймын, солай жазып қоямын, сосын сіздерге орындап беремін", - деді ол.
Тыңдармандарға ең бірінші ақынның "Қара жәшік" атты шығармасы ұсынылды. "Әр адамның ішінде ешқашан ашылмайтын, ешкім аша алмайтын бір-бір қара жәшік болады", - деді Мақпал Жұмабай.
writeFlash({"src":"https://www.youtube.com/v/H_WNijzu2bE","width":"450","height":"240"});
Мақпал Жұмабай. "Қара жәшік"
Бұдан кейін жиылғандар ақынның "Мақпал шер" атты өлеңін тыңдады. Ақын өлеңінде кішкентай қыздың бейнесіндегі персонаж арқылы туған елінің болашағына алаңдаушылық білдіріп, Отанға деген сүйіспеншілігін көрсетеді.
writeFlash({"src":"https://www.youtube.com/v/Ls9CO-cEpKA","width":"450","height":"240"});
Мақпал Жұмабай. "Мақпал шер"
Айта кетелік, кеште Мақпал ғана емес, жыр тыңдауға келген қонақтардың ішінен суырылып шыққан шыққан ақындар да өлең оқыды. Мәселен жақында ғана жыр кітабының тұсауын кескен Жақсылық Қазымұратыұлы "Мені сүйген бір қыз бар" өлеңін оқып берсе, ақын Шерхан Талап "Жайыққа жаяу тартып кетсем бе екен?" өлеңін оқыды. Бұдан бөлек Алматыға Ақтөбе, Орал, Көкшетау қалаларынан қонақ болып келген жас ақындар да тыңдармандарды өз шығармашылықтарымен таныстырды.
writeFlash({"src":"https://www.youtube.com/v/_Ya1Bu2CJxs","width":"450","height":"240"});
Мақпал Жұмабай. "Қарсылық"
Кеш соңында Мақпал бір айдан соң жеке сайтының ашылатындығын қуанышпен жеткізді. Оның айтуынша, оқырмандар сайттан мақамды жырлардың кәсіби студияда жазылған аудио нұсқаларын тыңдауға мүмкіндік алатын болады.
writeFlash({"src":"https://www.youtube.com/v/i_JZkN7eKR8","width":"450","height":"240"});
Мақпал Жұмабай. "Мұңды ғасыр"
Бұдан соң жиылғандар ақынмен естелік суретке түсіп, оған алғыстарын айтты. Ақын Мақпал Жұмабай да тыңдармандарға алғысын айтып, ізгі пейілін білдірді.
Дайындаған: Еркебұлан Қайрахан
сурет: ©Еркебұлан Қайрахан
видео: ©Еркебұлан Қайрахан