"Тарихи жеңіс". Паралимпиада ойындарының чемпионы Ербол Хамитов елге оралды

17 наурызда елорда әуежайында пара биатлоннан қысқы Паралимпиада ойындарының чемпионы әрі пара шаңғы жарысынан қола жүлдегер Ербол Хамитовті салтанатты түрде қарсы алу рәсімі өтті, - деп хабарлайды Massaget.kz тілшісі.

Спортшыны жанкүйерлері, туған-туыстары және спорт саласының өкілдері күтіп алды.

Туризм және спорт министрі Ербол Мырзабосынов, Ұлттық паралимпиада комитетінің өкілі Бақыт Сапаров Ербол Хамитов пен ұлттық құрама спортшыларын құттықтады.

"Бүгін - еліміз үшін қуанышты күн. Тарихымызда алғаш рет Паралимпиада ойындарында пара биатлоннан алтын медаль жеңіп алып, оған қоса бір Паралимпиадада екі бірдей медаль еншіледік. Бұл нәтиже - ерен еңбек пен тыңғылықты дайындықтың, мықты рухтың көрінісі. Осы ойындарға ұлттық құрама 7 спортшымен 2 спорт түрінен қатысып, жалпыкомандалық есепте 18-орынға тұрақтады. Спортшылардың әрқайсы ел намысын абыроймен қорғады. Cіздермен мақтанамыз", - деді министр.

Шара барысында демеушілік танытқан құрылыс компаниясы Ербол Хамитовқа екі бөлмелі пәтердің кілтін табыстады.

Спортшы да жанкүйерлеріне алғыс білдіріп, арман-мақсатқа адал болу керек екенін айтты.

Суреттер: gov.kz

Айта кетейік, Милан-Кортина қысқы Паралимпиада ойындары Италияда 6-15 наурыз аралығында өтті. Оған 55 елден 600-ден аса спортшы қатысып, 79 медаль жиынтығы сарапқа салынды.