Алматыда трамвай депосының жұмысы осыдан 10 жылдан аса уақыт бұрын тоқтаған еді. Мұндай шешімді сол кездегі қала әкімі Бауыржан Байбек қабылдады. Бұған екі бірдей трамвай апаты тіркеліп, резонанс тудыруы да себеп болды. Ақырында трамвай паркі толық жабылды. Бұрынғы трамвай депосының қазіргі жай-күйі қалай? Massaget.kz материалында.
Бұған дейін Алматы тұрғындары арасында трамвайға сұраныс жоқ екені айтылды. Десе де жауаптылар көліктің осы түрін қайтару жоспарланып отырғанын жеткізді. Бұл туралы "Алматыбасжоспар" ҒЗИ бас директоры Асхат Садуов мәлімдеді.
"Трамвай "Барлықтан" (базар - еск.) бастап Төле би көшесі бойымен жүреді. Бұрынғы жолында. Оны әуежайға дейін созамыз, осылайша батыс пен шығысты байланыстырамыз. Мақсатымыз - адамдар 20 минут ішінде жүріп-тұруына мүмкіндік жасау. Бұл - әлемдік тәжірибе және ақылға қонымды шешім", - деді ол.
Ал трамвай депосының орнына қоғамдық кеңістік жасау жоспарланған болатын, оны абаттандыру бойынша байқау жарияланып, 2017 жылы DEPO Evolution Park көпфункционалды кешенінің тұжырымдамасы таңдалды. Ол мына нысандарды қамтуға тиіс еді:
"Қазіргі барлық ғимарат сақталады, олардың ішінде коворкингтер, көрме алаңдары, іс-шаралар өткізуге арналған орындар, фудкорттар, т.б. орналасады", - деді сол кезде Алматыны дамыту орталығының өкілдері.
Алайда 10 жыл өтсе де, нысан әлі күнге дейін қаңырап бос тұр, тек бір ғимаратта жастар орталығы орналасқан.
Дрон арқылы түсірілген көріністен ғимараттан тек жартылай қираған қабырғалар қалғаны байқалады.
Бұл жерде бір кездері трамвайлар тоқтап, оларға осы жерде жөндеу жүргізілгенін білмесеңіз, қазіргі жағдайына қарап, депо болғанын түсіну қиын. Себебі баяғыдай рельстер де, вагондар да жоқ.
Бұл аумаққа жерасты коммуникациялары үшін жаңа бетон құрылымдар жеткізілген.
Аумақтың бір бөлігінде топырақ пен құрылыс қалдықтары үйіліп жатыр.
Кейінгі жылдары бұл жерді абаттандыруға қаржы бөлінбегенін ескерсек, топырақ пен бетон құрылымдарды кім әкелгені белгісіз.
Десе де аумақ толық қоршалған.
Бұл жерде бір кезде трамвайлар болғанын еске салатын жалғыз нәрсе - Байтұрсынов көшесінен бұрынғы депоға кіреберіс. Мұнда бұрынғы рельстер қалған.
Қоршау бойымен Масанчи көшесіне дейін жүрсеңіз, ішке кіруге болатын ашық қақпа көрінеді.
Ал ішкі жағы біртіндеп қоқысқа толып бара жатқаны байқалады.
Сондай-ақ, қоқыс пен ескі заттардың арасында жатқан шатырға ұқсас заттар, киім-кешек, шүберек, ескі жиһаздар аңғарылады.
Алматы әкімдігі Tengrinews.kz-тің "осы аумақты абаттандыру бойынша нақты шешім бар ма, оған қанша қаражат қажет және қала тұрғындары депо орнындағы дайын қоғамдық кеңістікті қашан көре алады?" деген сұрақтарына жауап берген.
"Қазір бұл нысан бойынша құрылыс-монтаж жұмыстарына қаржы бөлінуін күтіп отырмыз", - деді басқарма өкілдері.
Алайда шенеуніктер нақты мерзімді де, соманы да, нысанның осынша уақыт бос тұру себебін де атамаған.
Айта кетейік, Алматыда трамвай қозғалысы 1937 жылы ашылған. 1990 жылдардың ортасынан бастап бұл көліктің қозғалысы азайып, ақырында қалада тек екі бағыт, яғни №4 және №6 бағыттар қалған. 2015 жылы болған бірнеше апаттан кейін қалада трамвайлар мүлдем тоқтады.
Бүгінде Қазақстанда трамвай қозғалысы тек мына үш қалада бар: Павлодарда, Теміртауда және Өскеменде.