Бокстан әлем чемпионатының жеңімпаздары Алматыға оралды

Бокстан Қазақстан әйелдер құрамасы 2025 жылғы әлем чемпионатында үш алтын медаль жеңіп алды. Тарихқа үш дүркін әлем чемпионы ретінде енген команда капитаны Назым Қызайбай да бұған үлкен үлес қосты. 

Бүгін таңертең спортшыларды қалың көпшілік Алматы әуежайында қарсы алды. Ерте болғанына қарамастан мұнда көп адам жиналған: жеңімпаздардың туыстары, жанкүйерлері және БАҚ өкілдері келген.

Спортшылар кірген кезде бірден мерекелік атмосфераға тап болды: туыстарының жылы құшақтары, жанкүйерлердің қошеметі, оған қоса дәстүрлі түрде шашу да шашылды. Музыканттар мұны музыкамен әрлеп тұрды.

Ел намысын қорғап, көк Туды желбіреткен Назым Қызайбай эмоциясын бөлісті.

"Бокстан үш дүркін әлем чемпионы атанғаныма өте қуаныштымын. Бұл менің арманым, басты мақсатым болды, оған жеттім. Әрине, әлем чемпионатында жеңіл қарсылас болған жоқ. Бірақ мұндай жарыстардағы ең қиын нәрсе - жаттығу мен дайындық. Енді біраз демалып, қалпыма келемін, кейін келесі жарыстарға дайындаламын", - деді команда капитаны.

Ал Алуа Балқыбекова әлем чемпионатындағы алғашқы алтын медалін жеңіп алды. Спортшы да болашаққа жоспар құрып жатқанын айтты.

Күміс медаль иеленген Виктория Графеева Сербияға сапары финалда жеңілгеніне қарамастан ұмытылмас әсер қалдырғанын айтты.

Сербиядағы чемпионатта қазақстандықтар жалпы алты медаль жеңіп алды. Алтынды Назым Қызайбай (48 келі), Алуа Балқыбекова (50 келі) және Аида Әбікеева (63 келі) қоржынға салса, күмісті Виктория Графеева (60 келі) және Елдана Талипова (81 келі) салды, қоланы Наталья Богданова (70 келі) иеленді.

Чемпионат қорытындысы бойынша жеңімпаздар 100 мың доллардан, күміс жүлдегерлер 50 мыңнан, қола жүлдегерлер 25 мыңнан, ал 4-5-орын алған қатысушылар 10 мың доллардан алады.