Мектепке баратын бала не білуі тиіс?

Тереңдетіп оқытатын не басқа да мектептерде баланы бірінші сыныпқа емтихан тапсыру арқылы алады. Бала сынақтан сүрінбей өту үшін не қарапайым мектепке барғанда ата-анасын ұялтпауы үшін не білуі міндетті? Білімсіз адам сәннен қалған заманда сауатын ашып үлгермеген балаға да қойылар талап күшті.

• Ең алдымен өз аты-жөнін, ата-анасының аты-жөнін толық білуі тиіс. Тұрғылықты мекен жайын, телефон нөмірін, ата-анасының жұыс орнын да жатқа білгені жөн.

• өзі тұратын елдің, қаланың, өлкенің атын және өзге де елдер мен қалалардың атауларын мүдірмей атай білу.

• Ең көп таралған өсімдіктер, жануарлар, жәндіктер, аң-құстар мен балықтар атауы. Үй жануары мен жабайы жануарларды, көкөністерді және ішінде сүйегі бар жеміс пен сүйегі жоқ жидекті бір-бірінен ажырата білу.

• Жануарлар не себепті үй жануары және жабайы жануар деп бөлінетінін, қай жануар адамға қандай пайда тигізетінін түсіндіру.

• Құстар мен жануарлар сыртқы пішіні бойынша қалай ерекшеленетінін айту (тиіннің құйрығы үлкен, қоянның құлағы ұзын).

• Жылқы, сиыр, қой, ешкі, түйе, ит, мысық, аю, түлкі, қасқыр, кірпі балаларының, төлдерінің атауы.

• Жеміс пен жидектің қайсысы ағашта, қайсысы бұтада өсетінін ажырату. Жеміс-жидек пен көкністің түсін шатастырмау. 

• Үйде және балабақшада көріп жүрген өсімдіктерінің атын атау.

• Әуе көлігін, су көлігін, жермен және жер астымен жүретін көліктерді білу.

• Сол жақ құлағын, оң жақ көзін, сол жақ иығын, оң жақ тізесін, сол қолын қателеспей көрсету.

• әртүрлі мамандық атаулары мен мамандардың атқаратын қызметтері.

• Бөлмеден шарға ұқсайтын, төртбұрышқа, үшбұрышқа, дөңгелекке, шаршыға ұқсайтын нәрселерді тез табу.

• Қай зат жиһазға, ыдысқа, киімге, жеміске, көкөніске, аяқ киімге жататынын білу.

• Жыл мезгілдерін, бір жылда неше ай бар екенін, атауларын, бір айда неше күн, аптада неше күн, бір сағатта неше минут бар екенін ұмытпау.

• Басты түстерді шатастырмау.

• Оң мен солды, жоғары мен төменді, алды мен артын ажырату.

• Басты спорт түрлері, жолда жүру ережесі мен белгілері.

• Атақты ақын-жазушылардың аты-жөнін атау.

• Мереке күндері.

• Бос уақытында шұғылданатын сүйікті ісі туралы әңгімелей білу.

• Ең бастысы: мектепке не үшін барғысы келетінін айту.